Зеленский Абу-Дабидаги музокараларда келишмовчилик чиққанини айтди

Абу-Дабидаги музокараларда Россия делегацияси “Украина назорати остида қолаётган Донбасс ҳудудларини эгалланган” деб атаган. Бу ҳақда Украина Президенти Владимир Зеленский журналистлар билан мулоқот чоғида сўз очди. Баёнот матни бугун, 11 ноябрь куни Президент матбуот хизмати томонидан эълон қилинди.  

Зеленскийнинг сўзларига кўра, Украина музокаралар гуруҳи бу ҳақда унга учрашувлар якунлари бўйича иккинчи ҳисоботда маълум қилган. Унинг айтишича, Россия ҳарбийлари ва разведка вакиллари ушбу ҳудудлар устидан назорат ҳақида жиддий равишда гапирган.

“Бизнинг жамоа уларга шундай деди: “Биз бундай нарсаларни қандай қилиб умуман гапиришингиз мумкинлигини тушунмаяпмиз. Бизда ушбу ҳудудлар бизнинг назоратимиз остида эканини исботловчи видеоёзувлар, фотосуратлар ва бошқа далиллар бор”, дейди Зеленский.

У, шунингдек, Москва Вашингтонни Украина шарқини бир-икки ой ичида тўлиқ эгаллаш қобилиятига эга эканига ишонтираётган бўлиши мумкинлиги ҳақидаги фикрини билдирган.

“Мен ҳам унга Россияни тўлиқ оккупация қилганим тасвирланган расм чизиб беришим мумкин. Лекин бу ҳақиқат эмас-ку”, дейди у.

Шу билан бирга, Зеленскийнинг айтишича, Америка томони жанг майдонидаги вазият бўйича Украина берган баҳони тасдиқлаган.

Ушбу фонда у яна бир бор етакчилар даражасидаги музокаралар зарурлигини эълон қилган. Зеленский мураккаб масалаларга мисол тариқасида Херсон вилоятидаги вазиятни келтирган: у ерда томонлар позициясини Днепр ажратиб туради.

“Россияликлар бир қирғоқни назорат қилмоқда, биз эса бошқасини. Лекин одамлар иккала қирғоқда ҳам бирга яшашни хоҳлашади. Бу Украина шаҳри. Бундай масалалар нозик, аммо биз улар ҳақида гапиришимиз керак”, дея қайд этган у.

Зеленскийнинг қўшимча қилишича, музокаралар гуруҳлари етакчилар учрашуви ўтказиш имкониятини муҳокама қилиши мумкин. 

“Россия тайёр эканига ишончим комил эмас, лекин биз бу масалани кўтариб чиқамиз”, дейди у.

Эслатиб ўтамиз кеча, 10 ноябрь куни ёпиқ форматда АҚШ воситачилигида Россия, Украина ва АҚШнинг 4,5 соат давом этган уч томонлама музокараларининг биринчи куни бўлиб ўтган эди. Америка томонидан Президентнинг махсус вакили Стив Уиткофф ва Жаред Кушнер, Россия томонидан Президент ёрдамчиси Владимир Мединский, Украина томонидан эса Ташқи қидирув хизмати раҳбари Рустам Умаров вакиллик қилмоқда.

Музокараларнинг асосий мавзулари қаторида ҳарбий ҳаракатларни тўхтатиш, хавфсизлик кафолатлари, Украинани қайта тиклаш ва гуманитар масалалар ўрин олган.