Ўзбекистоннинг 2 шахматчиси FIDE рейтингида кучли бешликка кирди

46-Бутунжаҳон шахмат олимпиадасидан сўнг шахматчиларнинг янги рейтингдаги натижалари маълум бўлди. Халқаро шахмат федерацияси (FIDE) октябрь ойи учун халқаро рейтингни эълон қилди.

Очиқ рейтингда Жавоҳир Синдоров 2782 очко билан 4-ўринда қайд этилган. У сентябрь ойида 2778 очкога эга бўлган, яъни бир ойда рейтинг очколарини 4 тага оширган. Нодирбек Абдусатторов эса 2780 очко билан 5-ўринни эгаллаган. Унинг сентябрь ойидаги кўрсаткичи 2762 очко бўлиб, 18 та очко қўшилган.

Нодирбек Ёқуббоев 2712 очко билан 26-ўринда қайд этилган. У сентябрь ойида 2685 очкога эга бўлган ва бир ойда 27 та очко йиғган. Рустам Қосимжоновнинг натижаси 2665 очко бўлиб, аввалги ойга нисбатан ўзгармаган. Шамсиддин Воҳидов эса 2649 очко билан 66-ўринни эгаллаган, сентябрь ойидаги 2654 очкога нисбатан 5 та очко йўқотган.

Очиқ рейтингда эса норвегиялик Магнус Карлсен 2823 очко билан 1-ўринда қайд этилган. АҚШ вакиллари Ҳикару Накамура 2792 очко билан 2-ўринни, Фабиано Каруана 2784 очко билан 3-ўринни банд этган.

Аёллар рейтингида Афруза Ҳамдамова 2447 очко билан 26-ўринда қайд этилган бўлиб, сентябрь ойида унинг натижаси 2443 очко эди, яъни бир ойда 4 очко қўшган. Гулрухбегим Тоҳиржонова эса 2349 очко билан 91-ўринда қайд этилган ва унинг натижаси аввалги ойга нисбатан ўзгармаган.

Жаҳон аёллар рейтингида хитойлик Хоу Йифан 2596 очко билан 1-ўринда турибди. Унинг ҳамюрти Чжу Жинер 2559 очко билан 2-ўринни, Чжу Венжун эса 2553 очко билан 3-ўринни эгаллаган.

Эслатиб ўтамиз, аввалроқ Президент Шавкат Мирзиёев шахматчиларни Самарқандда ўтказилган 46-Бутунжаҳон шахмат олимпиадасидаги тарихий ғалаба билан табриклагани ва уларга мукофотларни топширгани ҳақида хабар берилган эди.