Uzairways йўловчилари 16 соат аэропортда қолиб кетди (видео)

Ижтимоий тармоқларда Uzbekistan Airways авиакомпаниясининг Истанбул-Тошкент йўналишидаги HY272 рейси кечикиб, йўловчилар 16 соатдан бери аэропортда парвозни кутаётгани акс этган видео тарқалди. Ҳолат юзасидан тарқалган видео изоҳлар бўлимига Uzbekistan Airways муносабатини ёзиб қолдирди.

Авиакомпаниянинг маълум қилишича, 2026 йил 25 август куни Истанбул–Тошкент йўналиши бўйича HY272 қатнови техник сабаблар туфайли кечиккан.

Қайд этилишича, техник носозлик юзага келганидан сўнг қатновни захира ҳаво кемасида амалга ошириш тўғрисида қарор қабул қилинган.

Кутиш вақтида йўловчиларга зарур ёрдам кўрсатилгани айтилмоқда. Компания маълумотига кўра, дастлаб уларга салқин ичимликлар ва сэндвичлар, кейинчалик эса иссиқ овқат учун ваучерлар ҳамда сув тақдим этилган. Бироқ ижтимоий тармоқларда тарқалган видеода йўловчилар битта нон ва булочка олганини айтган.

“Битта нон, битта булочка бериб қўйишяпти. Ёшлар майли, булочка еди. Ёши катталар нима ейди? На иссиқ чой берилгани йўқ ҳеч кимга”, деган йўловчилар видеомурожаатда.

Шунингдек, авиакомпания муносабатида ҳаракат жадвалидаги ўзгаришлар ва кейинги янгиланишлар ҳақидаги маълумотлар йўловчилар ҳамда уларни кутиб олувчилар учун махсус ахборот каналида тезкорлик билан эълон қилиб борилгани қайд этилган. Авиакомпания бу борадаги маълумотлар “uzairways_live” Telegram-каналида берилганини билдирган.

Uzbekistan Airways кутиш вақтининг янада чўзилиб кетишига йўл қўймаслик мақсадида Истанбул-Тошкент йўналиши бўйича захира ҳаво кемасида олиб келиш қатнови ташкил этилганини маълум қилган.

“Бундай узоқ давом этган кечикиш йўловчилар учун қанчалик ноқулай бўлишини тушунамиз. Юзага келган ҳолат учун афсусдамиз”, дейилади авиакомпания баёнотида.

Эслатиб ўтамиз, аввалроқ ижтимоий тармоқларда Centrum Air авиакомпаниясига нисбатан эътирозли мурожаатлар эълон қилинган эди. Хусусан, актриса Баҳора Арслонова ушбу компаниядан чипта олиб, манзилига уча олмаганини айтиб чиққанди.