Уйида қумдан олтинни ажратадиган цех ташкил қилган тиллафурушлар ушланди

Навоийда ноқонуний олтин савдоси билан шуғулланган ҳамда хонадонида қумдан олтинни ажратиб оладиган цех ташкил қилган шахслар ушланди. Бу ҳақда Давлат хавфсизлик хизмати хабар берди.

Маълум қилинишича, ДХХ ҳамда Иқтисодий жиноятларга қарши курашиш департаменти ходимлари ҳамкорлигида Навоий шаҳрида ўтказилган тезкор тадбирда ноқонуний олтин савдосига чек қўйилган.

Хусусан, Бухоро вилоятининг Шофиркон туманида яшовчи, 1987 ва 1993 йилларда туғилган 2 нафар шахс 212,9 гр қуйма олтинни харидорга 340 млн сўмга сотишга келишишади. Тиллафурушлар мижозга 999 пробали 26,3 гр олтинни берган ҳолда, қолган қисмини кейинроқ етказиб беришларини айтиб, ундан 20 минг АҚШ доллари ва 100 млн сўм олган вақтларида ашёвий далиллар билан ушланган. 

Шунингдек, улардан бири ўз яшаш хонадонида қумдан олтинни ажратиб олишга мўлжалланган яширин цех ташкил қилганлиги ҳам аниқланган. 

Билдирилишича, ҳозирда уларга нисбатан Жиноят кодексининг 177-моддаси (Валюта қимматликларини, қимматбаҳо металлар ва (ёки) қимматбаҳо тошларни қонунга хилоф равишда олиш ёки ўтказиш) 4-қисми “а” банди билан жиноят иши қўзғатилиб, тергов ҳаракатлари олиб борилмоқда.

Эслатиб ўтамиз, аввалроқ Навоийда давлат муҳофазасига олинган ер майдонида ноқонуний олтин қазиш билан шуғулланган шахс аниқланганди.