Ўлик ҳолда топилган актёрнинг севгилиси шубҳали кўрсатма берди

Турк кино ва театрининг таниқли вакилларидан бири, машҳур актёр Серҳат Мустафо Қилич жорий йилнинг 5 сентябрь куни Истанбулдаги уйида ўлик ҳолда топилган эди. Унинг севгилиси Ўзлем Эсмергул прокуратурага берган кўрсатмасида полициядаги баёнотидан фарқли маълумотларни айтиб, Қилич гиёҳванд моддалар ва алкоголь истеъмол қилганини тан олди. Бу ҳақда “Haberler“ хабар берди.

Қайд этилишича, Ўзлем Эсмергул полициядаги кўрсатмасида Қиличда гиёҳванд моддалар ва алкогольга қарамлик бўлмаганини билдирган. Бироқ прокуратурага берган кўрсатмасида у актёр гиёҳванд моддалар ва алкоголь истеъмол қилганини айтган.

“Уни таниганимдан бери гиёҳванд моддалар ва алкоголь истеъмол қилганини биламан. Билишимча, сўнгги 6 ой давомида у кокаин ҳам истеъмол қилган. Унинг душманлари йўқ эди“, деган Эсмергул.

У прокурорга берган кўрсатмасида Қилични 8 йилдан бери билишини, у билан охирги марта жорий йилнинг 3 сентябрь куни, яъни воқеадан икки кун олдин телефон орқали гаплашганини айтган. Унинг сўзларига кўра, актёр соғлиғи сабаб суратга олиш майдонига бора олмагани учун иштирок этаётган сериалида ишлашдан четлатилган.

Эсмергулнинг айтишича, Қилич соғлиғи жуда ёмон аҳволда эканини ҳам билдирган. У соғлиғи сабаб суратга олишда қатнашa олмагани учун Эсмергул ва суратга олиш майдонидаги дўстлари билан жанжаллашган. Кейинчалик Қилич қўнғироқларга жавоб бермай қўйган. Бироқ Эсмергул актёр феъл-атворига кўра, ранжиган одамлари билан баъзан 5-6 кун гаплашмаслигини айтиб, дастлаб бундан шубҳаланмаганини билдирган.

Эсмергулнинг сўзларига кўра, у жорий йилнинг 7 сентябрь куни Қиличнинг олдига бориб, бирор нарсага муҳтож ёки муҳтож эмаслигини текширмоқчи бўлган. Бироқ бирдан ичига шубҳа тушиб, унинг уйига боришга қарор қилган.

У хонадонга ўзида бўлган захира калит ёрдамида кирганини, полда синган тарелка бўлаклари сочилиб ётганини, уй ичкариси жуда совуқ ва кондиционер ёқилганини айтган. Қиличга қўл теккизганида унинг танаси қотиб қолганини сезган ва унинг вафот этганига ишонч ҳосил қилгач, полицияга хабар берган.

Шунингдек, Ўзлем Эсмергул Қилич сўнгги вақтларда Истанбулнинг Шишли туманидаги хусусий шифохонада бўйин умуртқаси чурраси сабаб даволанганини маълум қилган. Унинг айтишича, актёр айнан шу касаллиги туфайли ишга бора олмаган ва бўйин боғич тақиб юрган.

Тергов доирасида Истанбул полиция бошқармасининг ҳодиса жойини кўздан кечириш бўлими ходимлари томонидан тайёрланган баённома ҳам маълум бўлган.

Баённомада Қиличнинг хонадони жойлашган мажмуа кириш қисмида қўриқчи ва кузатув камералари бўлгани, кириш-чиқиш назорат қилиниши қайд этилган. Бино кириш қисмида йўлакни тасвирга оладиган кузатув камераси ҳам бўлган. Хонадоннинг темир кириш эшигида бузиб кирилганлик излари аниқланмаган. Эшикда калит бўлмаган. Йўлак ва меҳмонхонага кириш қисмида эса ранги ва нақши бир хил бўлган тарелка бўлаклари топилган.

Меҳмонхонадаги ёғоч журнал столида турган металл қути ичидан гиёҳванд модда деб тахмин қилинаётган яшил ўсимликсимон модда топилган. Шунингдек, пакет ичидан сигарет ўраш учун ишлатиладиган қоғоз аниқланган. Китоб жавони олдида турган матоли чемодан ичидан ҳам қора қисқичли пакетда гиёҳванд модда деб тахмин қилинаётган яшил ўсимликсимон модда топилган.

Бундан ташқари, чемодандан 200 турк лирасидан иборат 3 дона банкнота топилган. Улар найча шаклида ўралган бўлиб, баённомада гиёҳванд моддаларни истеъмол қилишда фойдаланилган бўлиши мумкинлиги қайд этилган. Серҳат Қиличнинг ўлими юзасидан тергов давом этмоқда.

Эслатиб ўтамиз, аввалроқ Туркиянинг машҳур театр актёри Ўкан Каражан Истанбулнинг Шишли туманидаги тадбир вақтида стол устида турган ноутбукни ўғирлаганликда гумон қилинаётгани ҳақида хабар берилган эди.