Уганда Конгодан қайтган фуқароларни Эбола сабаб карантинга олади

Уганда Конго Демократик Республикасига сафар қилган ва мамлакатга қайтган фуқароларни 21 кунлик карантинга жойлаштиради. Бу ҳақда кеча, 25 октябрь куни мамлакат Соғлиқни сақлаш вазири Крис Бариомунси маълум қилди.

Қайд этилишича, бу чора Эбола вируси тарқалишининг олдини олиш мақсадида жорий этилмоқда. Уганда ҳукумати июль ойида мамлакатда сўнгги Эбола эпидемияси якунланганини эълон қилган. Бироқ яқинда Уганда орқали ўтган икки кишида Кения ва Нигерияда Эбола вируси аниқлангани хавотирларни кучайтирган.

Нигерияда вирус аниқланган 42 ёшли аёл Швейцария дипломати рафиқаси бўлиб, жорий йилнинг 3 октябрь куни Уганда орқали Эфиопиянинг Аддис-Абеба шаҳри орқали Абуджага борган. Ҳозир у изоляцияда, аҳволи эса анча яхшиланган. У билан алоқада бўлган 53 киши аниқланган.

Швейцария расмийлари аёл вирусни Угандада юқтирган бўлиши мумкинлигини билдирган. Бироқ Уганда соғлиқни сақлаш вазири бу хулосани эрта деб атаган. Унинг айтишича, аёл билан Кампалада учрашган қариндошлари аввал Конго Демократик Республикасига борган.

Кенияда Эбола аниқланган биринчи бемор ҳам Конгодан Уганда орқали ўтган ва 3 октябрь куни Энтеббе аэропортидан Найробига учган. У икки кундан кейин вафот этган. Ҳар икки мамлакатда касаллик аниқланган беморлар бир кунда Энтеббе аэропорти орқали ўтган, бироқ улар ўзаро бевосита алоқада бўлмаган. Бу аэропорт кузатув камералари ёзувларини текшириш орқали аниқланган.

Вазирнинг маълум қилишича, Кениядаги ҳолат билан боғлиқ 60 кишининг 21 кунлик кузатув муддати якунланган ва улар назоратдан чиқарилган.

Уганда ҳукумати Энтеббе халқаро аэропорти ҳамда қуруқликдаги чегара пунктларида йўловчиларни текширишни кучайтирган. Мамлакатга ҳаво, қуруқлик ёки сув йўли орқали кирадиган барча йўловчилар махсус анкета тўлдириши керак.

Бундан ташқари, кеча, 25 октябрь куни Жаҳон соғлиқни сақлаш ташкилоти бош директори Тедрос Адханом Гебрейесус Конго Демократик Республикасининг Бафвасенде шаҳрида Эбола хавфи бўйича чақирувга жавоб бераётган тиббиёт ходимларига ҳужум қилинганини ҳам маълум қилган. Ҳодиса оқибатида бир ҳамшира ҳалок бўлган, яна бир тиббиёт ходими оғир яраланган.

Эслатиб ўтамиз, аввалроқ Нигерия пойтахти Абуджада ҳам Эбола вируси билан касалланиш ҳолати қайд этилгани ҳақида хабар берилган эди.