Туркиядаги мактабда пичоқбозлик: ўқувчи ҳалок бўлди

Туркиянинг Истанбул шаҳрида мактабда содир бўлган пичоқли ҳужум оқибатида 10 яшар ўқувчи ҳалок бўлди. Яна 7 нафар ўқувчи шифохонада даволанмоқда. Бу ҳақда “Haberler“ хабар берди.

Воқеа бугун, 6 октябрь куни Истанбулнинг Башакшехир туманидаги Шайх Шамил Имом Ҳатиб ўрта мактабида содир бўлган. Ҳужум оқибатида 8 нафар ўқувчи жароҳатланган. Улардан 10 ёшли Э.С.Б. шифокорларнинг барча уринишларига қарамай, шифохонада вафот этган.

Ҳужумни содир этган гумондор Кучукчекмежа туманидаги лицейда таҳсил олаётган 10-синф ўқувчиси Ф.М. экани аниқланган. У воқеадан кейин қўлга олинган. Туркия Соғлиқни сақлаш вазири Камол Мемишўғли ҳужумда жароҳатланган 8 нафар ўқувчининг шифохоналарда даволанаётганини билдирган. Улардан бирининг аҳволи оғир, яна икки нафарининг ҳолати ўртача оғир экани айтилган.

Воқеадан сўнг мактабда ўқув жараёнига икки кун, яъни 6–7 октябрь кунлари танаффус берилган. Ҳодиса юзасидан жиноий ва маъмурий текширув бошланган. Воқеани ҳар томонлама ўрганиш учун икки нафар таълим инспектори ҳам жалб қилинган. Шунингдек, ҳужумдан жабр кўрган ўқувчилар, ўқитувчилар ва ота-оналарга психологик ёрдам кўрсатиш учун махсус гуруҳлар иш бошлаган.

Эслатиб ўтамиз, аввалроқ Туркиянинг Маниса вилояти Тургутлу туманидаги лицей олдида номаълум шахс қурол билан атрофга ўқ узганди. Ҳужум оқибатида бир ўқувчи ҳалок бўлган, 8 киши жабрланган.