Трамп Ўзбекистонга боришни истайди – Паоло Замполли

АҚШ Президенти Дональд Трамп Ўзбекистонга ташриф буюришни истаяпти, бироқ эҳтимолий ташриф муддати ҳозирча номаълум. Бу ҳақда АҚШ Президентининг глобал шериклик бўйича махсус вакили Паоло Замполли “Ўзбекистон 24” телеканалининг “Таҳлилнома” дастурига берган интервьюсида маълум қилди.

“Мен унинг Ўзбекистонга келишни истаётганини биламан. Президентнинг иш жадвали жуда тиғиз. Аммо у менга Ўзбекистонга ташриф буюриш нияти борлиги ҳақида гапирган. Мен ўзим ҳам ушбу масалани илгари суриб келяпман”, дейди махсус вакил.

Замполлининг сўзларига кўра, Америка томони ташриф имкон қадар тезроқ амалга ошишига умид қилмоқда. Шу билан бирга, у аниқ санани айтмаган.

Эслатиб ўтамиз, жорий йилнинг 7 август куни Ўзбекистон Республикаси Президенти Шавкат Мирзиёевнинг Америка Қўшма Штатлари Президенти Дональд Трамп билан телефон орқали мулоқоти бўлиб ўтган эди. Ўша мулоқотда Шавкат Мирзиёев Дональд Трампга ўзи учун қулай вақтда расмий ташриф билан мамлакатга келишни таклиф қилганди.

Шунингдек, жорий йилнинг октябрь ойи ўрталарида АҚШ Давлат котиби Марко Рубио Самарқандга келиши ҳақида хабар берилганди. Ташриф давомида Рубио Қозоғистон, Қирғиз Республикаси, Тожикистон, Туркманистон ва Ўзбекистон Ташқи ишлар вазирлари билан биргаликда C5+1 вазирлар учрашувида иштирок этади. Муҳокамалар C5+1 формати доирасида минтақавий иқтисодий боғлиқликни чуқурлаштириш, энергетика хавфсизлигини мустаҳкамлаш ва умумий минтақавий устувор йўналишлар бўйича ҳамкорликдаги ечимларни илгари суришга қаратилади.