Трамп сунъий интеллектни қайта номлади (видео)

Америка Президенти Дональд Трамп бундан буён АҚШда сунъий интеллект (СИ) “супер интеллект” деб аталишини маълум қилди ва бошқа мамлакатларни ҳам уларнинг таърифига эргашишга чақирди. Бу ҳақда у кеча, 22 сентябрь куни БМТ Бош Ассамблеясидаги нутқида сўз очди.

“Шу дақиқадан бошлаб АҚШнинг барча ҳужжатларида ва умид қиламанки, бутун дунёда “сунъий интеллект” ўрнига анча аниқроқ бўлган “супер интеллект” атамаси қўлланилади”, дейди Трамп.

Унинг фикрича, янги атама “анча яхшироқ янграйди”. У “сунъий” сўзи технология ҳақида гўёки у “сохта, аслий бўлмаган” нарсадек янглиш таассурот уйғотади деб ҳисоблайди.

Трамп, шунингдек, СИ таҳдидлари ҳақидаги огоҳлантиришлар уйдирма экани ҳақида фикр билдирган. Унинг сўзларига кўра, иқлим ўзгариши сабабли инсониятнинг муқаррар ҳалокати ҳақида гапирган ўша одамларнинг ўзи энди жамоатчиликни “роботлар инсониятга ҳужум қилмоқчи” деб қўрқитмоқда.

Шу билан бирга, Трамп АҚШ СИ ривожланишини диққат билан кузатиб боришини қайд этган ва зарур ҳолларда “АҚШ Адлия вазирлиги ва бошқа ҳуқуқни муҳофаза қилиш органлари вазиятни назорат остига олишга тайёр” эканини таъкидлаган.

Америка етакчиси ушбу соҳада технологиялар ривожланишини рағбатлантиришга тайёрлигини ҳам билдирган.

“Мен саноат инқилобидан ҳам йирикроқ ҳодисага айланадиган нарсанинг ривожланишини жиловламоқчи эмасман”, дейди у.

Қайд этиш жоиз, сўнгги ҳафталарда АҚШда СИни кейинги ишланмаларини бироз секинлаштириш ва технология инсониятга таҳдид солмаётганига амин бўлиш кераклиги ҳақидаги ғоя фаол муҳокама қилинмоқда. Хусусан, ушбу соҳада фаолият юритаётган АҚШнинг энг йирик компаниялари раҳбарлари шундай чоралар тарафдори эканини билдирган.

Эслатиб ўтамиз, аввалроқ Американинг Anthropic компаниясида СИ мувофиқлигини стресс-тестдан ўтказиш йўналиши раҳбари Эван Хьюбингер сунъий интеллектнинг яқин ўн йил ичида инсониятни йўқ қилиш эҳтимоли 10 фоизни ташкил этишини маълум қилган эди.