Трамп Мадуродан сўнг илк бор Венесуэла муваққат раҳбари билан учрашади

АҚШ Президенти Дональд Трамп Венесуэла муваққат президенти Делси Родригес билан Николя Мадуро ҳибсга олинганидан кейин биринчи марта учрашади. Бу ҳақда “Reuters” хабар берди.

Учрашув бугун, 23 сентябрь куни Нью-Йоркда БМТ Бош Ассамблеяси доирасида Трамп мезбонлик қилаётган қабул маросимида бўлиб ўтиши режалаштирилган. Учрашув маҳаллий вақт билан соат 19:40 да бошланиши кутилмоқда.

Родригеснинг АҚШга ушбу ташрифи у жорий йил январь ойида Венесуэла муваққат президенти лавозимига келганидан кейин мамлакатга биринчи бор келиши ҳисобланади. У эртага, 24 сентябрь куни БМТ Бош Ассамблеясида нутқ сўзлаши кутилмоқда.

Оқ уйнинг маълум қилишича, учрашувда Трамп билан бирга АҚШ давлат котиби Марко Рубио, Молия вазири Скотт Бессент, Оқ уй маъмурияти раҳбари Сьюзи Уайлс ҳамда Президент ёрдамчиси ва сиёсат бўйича бош маслаҳатчи ўринбосари Стивен Миллер иштирок этади.

Родригес Мадуронинг собиқ вице-президенти бўлган. Трамп у билан ишчи муносабатлар ўрнатган. Бироқ танқидчилар Вашингтон Венесуэла мухолифати, жумладан Мария Корина Мачадо бошчилигидаги кучларни четга суриб, муваққат ҳукумат билан нефть ва инвестиция келишувларини устувор қўяётганини таъкидламоқда.

23 сентябрь куни Нью-Йоркда 50 дан ортиқ венесуэлалик Родригеснинг ташрифига қарши намойиш ўтказган. Улар Венесуэлада эркин сайловлар ўтказилишини талаб қилган.

Трамп БМТ Бош Ассамблеясида сўзлаган нутқида Мадурони “қонунбузар диктатор” деб атади. У Мадуро қўлга олинганидан кейин Венесуэлада юзлаб сиёсий маҳбуслар озод қилинганини айтди ва АҚШнинг январь ойидаги операциясини Ғарбий яримшарда ўз манфаатларини ҳимоя қилиш учун тенгсиз ҳарбий қудратдан фойдаланишга тайёрлигининг далили сифатида кўрсатган.

Трампнинг айтишича, унинг маъмурияти ўтган ойда Каракас билан имзолаган нефть келишуви “эҳтимол, ҳеч қачон тузилган энг йирик келишув” бўлган. АҚШ Президенти Венесуэла нефть саноатига 100 миллиард доллар инвестиция киритилишини исташини билдирган.

Маълумот учун, Родригес Нью-Йоркка 21 сентябрь куни Венесуэла делегацияси билан борган. Делегация АҚШ расмийлари, халқаро молия ташкилотлари ва компаниялар билан энергетика, тоғ-кон саноати ва Венесуэла қарзларини қайта тузиш масалаларини муҳокама қилмоқда.

Венесуэла Интер-Америка тараққиёт банкидан 2,5 миллиард долларлик кредит олишга ҳаракат қилмоқда. Бироқ банк директорлар кенгашининг айрим аъзолари бу масалага қаршилик билдирмоқда.