Тошкентдаги қурилиш майдонида 51 туп дарахт кесиб ташланди

Тошкент шаҳрининг Яшнобод туманида кўп қаватли уйлар қураётган корхона 51 туп дарахтни рухсатсиз кесиб ташлади. Қурилиш майдонида бошқа экологик қонунбузарликлар ҳам аниқланиб, корхонага 5,1 млрд сўмдан ортиқ тўлов ва зарарни қоплаш мажбурияти юклатилди. Бу ҳақда Экология ва иқлим ўзгариши қўмитаси хабар берди.

Қайд этилишича, Экополиция ходимлари Жарқўрғон кўчасида “B..D.” МЧЖ томонидан олиб борилаётган қурилиш ишларини ўрганган. Текширувда корхона давлат экологик экспертизасининг ижобий хулосасини олган бўлса-да, унда белгиланган талабларнинг аксариятига амал қилмагани аниқланган.

Хусусан, қурилиш майдонига кириш-чиқиш йўлларида юк машиналари ғилдиракларини ювиш учун блок-постлар ташкил этилмаган. Оқибатда лой ва тупроқ Жарқўрғон кўчасининг 2–2,5 километр қисмига ёйилган. Қуриган тупроқ машиналар ҳаракати сабаб ҳавога кўтарилиб, кучли чанг ҳосил қилган. Шунингдек, ҳавони муҳофаза қилиш чоралари ҳам ишлаб чиқилмаган.

Бундан ташқари, эски биноларни бузишдан ҳосил бўлган 126 минг 188,9 тонна чиқинди ва котлован қазишдан чиққан 368 минг 432 тонна тупроқ қаерга олиб кетилгани бўйича корхона ҳеч қандай ҳужжат тақдим этмаган. Ўлчовлар давомида ҳудудда 12 минг 36 тонна қаттиқ маиший ва қурилиш чиқиндиси белгиланмаган жойга тўплаб қўйилгани маълум бўлган.

Текширувда яна 51 туп дарахт – 50 туп арча ва бир туп чинор рухсатсиз кесилгани аниқланган. Корхона уларни кесиш учун ариза берган, бироқ Тошкент шаҳар экология бошқармаси бунга рухсат бермаган.

Шунингдек, корхона ҳудуднинг камида 25 фоизини кўкаламзорлаштириш, углерод нейтраллиги режасини ишлаб чиқиш каби экологик экспертиза талабларини ҳам бажармаган. Чиқиндиларни олиб чиқиш ва оқова сувларни ташиш бўйича шартномалар ҳам тузилмаган.

Аниқланган қонунбузарликлар учун корхонага атроф-муҳитни ифлослантириш ва чиқиндиларни ноқонуний жойлаштириш бўйича 5 млрд 183 млн 364 минг 476 сўм компенсация тўлови ҳисобланган. Кесилган дарахтлар учун эса ўсимлик дунёсига етказилган 396 млн сўмлик зарарни қоплаш белгиланган.

Бундан ташқари, кесилган ҳар бир дарахт ўрнига 100 тупдан, жами 5 100 туп кўчат экиш ва уларни уч йил давомида парваришлаш мажбурияти юклатилган. Корхона раҳбарига Маъмурий жавобгарлик тўғрисидаги кодекснинг 85-1-моддаси (Қурилиш майдонларида атмосфера ҳавосини муҳофаза қилиш талабларига риоя этмаслик) 1-қисми билан 4 млн 400 минг сўм жарима солинган.

Экология қўмитаси корхонага чанг кўтарилишининг олдини олиш, чиқиндиларни ҳудуддан олиб чиқиш ва қайта ишлашга топшириш ҳамда зарур экологик ҳужжатларни тайёрлаш бўйича кўрсатмалар берган.

Эслатиб ўтамиз, аввалроқ Тошкент вилоятининг Бўстонлиқ туманида 586 туп дарахт ноқонуний равишда илдизи билан қўпориб ташлангани аниқлангани ҳақида хабар берилган эди.