Тошкентда буюртма асосида одам ўғирламоқчи бўлганлар ушланди (видео)

Тошкентда икки кишини ўғирлашни режалаштирган, улардан бирига электрошокер ишлатмоқчи бўлган жиноий шериклар ушланди. Бу ҳақда Ички ишлар вазирлиги хабар берди.

Қайд этилишича, фуқаро номаълум шахслар томонидан автомашинага мажбуран ўтқазиб олиб кетилганини, бироқ қатъий қаршилик кўрсатиб, қочиб қутулганини айтиб, ИИВ Тезкор-қидирув департаментига мурожаат қилган.

Мурожаат юзасидан ўтказилган тезкор тадбир давомида икки нафар жиноий шерик қўлга олинган. Улар 2003 ва 1998 йилларда Тошкент шаҳрида туғилган бўлиб, муқаддам Жиноят кодексининг 169-моддаси (ўғирлик) билан судланган. Уларга тегишли автомобиль кўздан кечирилганда, юкхонасидан битта ўткир тиғли болта топилиб, процессуал тартибда расмийлаштирилган.

Суриштирув давомида гумонланувчилар ўзларига қўйилган айбловларни тан олган. Уларнинг телефонлари текширилганда, Telegram мессенжерида буюртмачи билан ёзишмалари аниқланган.

Маълум бўлишича, улар аризачини ҳар қандай йўл билан бўлса ҳам буюртмачига олиб бориш ҳақида топшириқ олган. Бундан ташқари, яна бир фуқарони ҳам мажбуран олиб келиш, қаршилик кўрсатган тақдирда эса бўйнига электрошокер билан уриб, ҳушидан кетказиш орқали етказиш режалаштирилган.

Гумонланувчилар иккинчи фуқарони ўғирлаш мақсадида унинг ишхонаси олдида қарийб тўрт соат кутган. Бироқ у хизмат сафарига кетганини билгач, режаларини бошқа кунга қолдирган.

Мазкур ҳолат юзасидан уларга нисбатан Ўзбекистон Республикаси Жиноят кодексининг 137-моддаси (одам ўғирлаш) иккинчи қисми “б” ва “в” бандлари билан жиноят иши қўзғатилган.