Тошкентда 900 дан ортиқ мижозга наркотик сотган шахс ушланди

Тошкент шаҳрида гиёҳвандлик воситалари савдоси билан шуғулланган иккита онлайн дўкон фаолиятига чек қўйилди. Уларнинг бири орқали 213 нафар, иккинчиси орқали эса 703 нафар мижозга наркотик моддалар таклиф этилган ва сотилган. Бу ҳақда Тошкент шаҳар Ички ишлар бош бошқармаси хабар берди.

Қайд этилишича, Президент Администрацияси ҳузуридаги Наркотиклар ва ўқотар қуролларни назорат қилиш агентлиги ҳамда Тошкент шаҳар Ички ишлар бош бошқармаси Кибержиноятларга қарши курашиш бошқармаси ходимлари ҳамкорлигида тезкор-қидирув тадбирлари ўтказилган.

Тадбирлар давомида наркотик ва синтетик моддалар савдоси билан шуғулланган икки интернет дўконнинг администратори бўлган фуқаро қўлга олинган.

Текширувда биринчи интернет дўкон орқали 213 нафар, иккинчиси орқали 703 нафар мижозга гиёҳвандлик воситалари таклиф этилгани ва сотилгани аниқланган. Гумонланувчи мижозлар учун яшириб қўйилган бир нечта наркотик моддалар жойлашган манзилларни ички ишлар органлари ходимларига кўрсатган. Ашёвий далиллар холислар иштирокида расмийлаштириб олинган. Шунингдек, фуқаро крипто-активлар айланмаси билан ҳам ноқонуний равишда шуғулланиб келгани маълум бўлган.

Билдирилишича, ҳолат юзасидан Жиноят кодексининг 273-моддаси (Гиёҳвандлик воситаларини, психотроп моддаларни ёки уларнинг аналогларини ўтказиш мақсадини кўзлаб қонунга хилоф равишда тайёрлаш, қайта ишлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 5-қисми билан жиноят иши қўзғатилиб, қамоққа олиш тарзидаги эҳтиёт чораси қўлланган. Ҳозирда дастлабки тергов ҳаракатлари олиб борилмоқда.

Эслатиб ўтамиз, аввалроқ Тошкентда интернет наркодўкони орқали гиёҳвандлик воситаларини тарқатиб келган икки нафар фуқаро қўлга олингани ҳақида хабар берилган эди.