Тошкентда 5 минг доллар пора олган инспекторлар ушланди

Тошкент шаҳрининг Юнусобод туманида Солиқ инспекциясининг икки нафар инспектори пора олаётган вақтида қўлга олинди. Бу ҳақда Давлат хавфсизлик хизмати хабар берди.

Маълум қилинишича, инспекциянинг икки нафар инспектори ўзаро тил бириктирган ҳолда хизмат мавқеидан фойдаланиб, тадбиркорга “Чилонзор буюм бозори комплекси” АЖдан учта савдо дўконини ижарага олишда ёрдам беришни ваъда қилган.

Улар ўзларининг танишлари орқали тадбиркорга тегишли МЧЖнинг очиқ савдо тендерида ғолиб бўлишини таъминлаш ва дўконларни ижарага олиш бўйича шартномаларни расмийлаштириб бериш эвазига 5 минг доллар талаб қилган.

Ўтказилган тезкор тадбир давомида солиқчилар сўралган пул маблағини олган вақтларида ашёвий далиллар билан ушланган.

Ҳозирда уларга нисбатан жиноят иши қўзғатилиб, тергов ҳаракатлари олиб борилмоқда.

Эслатиб ўтамиз, аввалроқ Наманган вилоятида фуқарога қўзғатилган жиноий ишни тугатиб юбориш эвазига 40 минг доллар талаб қилган терговчи ва адвокат қўлга олинганди.