Тинчликка тупурган раҳбарлар, тугаётган аномал иссиқ ва шубҳали ўлим — Weekend

Бундай вазиятда энг катта хавф шундаки, можаро энди фақат Вашингтон ва Теҳрон ўртасида эмас. У минтақанинг деярли барча муҳим давлатларини ўз орбитасига тортмоқда. Саудия Арабистони, Исроил, Қатар, Иордания, Ироқ, Сурия ва Яман аллақачон ушбу геосиёсий тўқнашувнинг бевосита ёки билвосита иштирокчисига айланган.

Шундан сўнг, Дональд Трампнинг таҳдидлари фантастик тус ола бошлади. Яқин орада АҚШ Эрондаги Пикакс тоғига зарба беришини маълум қилиб, Вашингтон Эронга қарши кучли ҳужумларни давом эттириши ҳақида огоҳлантирди.

“Биз Пикакс тоғини йўқ қиламиз. Эронликларга тайёр туришларини айтинг”, деган Трамп The Hugh Hewitt Show дастурига берган интервьюсида.

“Reuters” манбасининг ёзишича, Пикакс тоғи Эроннинг жиддий зарар кўрган Натанз уранни бойитиш иншооти яқинида жойлашган. Тоғ ичида иккита чуқур ерости туннель мажмуаси мавжуд. Мутахассислар ушбу объект АҚШ ихтиёридаги энг кучли бункерга қарши бомбалар зарбасига ҳам бардош бера олишини айтмоқда.

Геосиёсий нуқтаи назардан қараганда, АҚШнинг асосий мақсади Эронни минтақавий етакчи сифатида кучайишига йўл қўймасликдир. Нега? Чунки Эроннинг кучайиши Исроилга хавф сола бошлайди. Шундай экан, Исроил тинчлик ўрнатилишини хоҳламас экан, бу урушни тугашини кутиш бефойда.

Грем ўлими ортидаги шов-шувлар

АҚШ сиёсатидаги энг таъсирли республикачилардан бири саналган сенатор Линдси Грэмнинг кутилмаган вафоти нафақат мамлакат сиёсий ҳаётида, балки жаҳон саҳнасида ҳам катта акс-садо берди. 2026 йил 12 июль куни 71 ёшида вафот этган сиёсатчининг ўлими дастлаб турли тахминларга сабаб бўлди. Орадан кўп ўтмай, шифокорлар унинг ўлимига аортанинг ёрилиши сабаб бўлганини маълум қилди. Бироқ бу изоҳ ҳам турли фитна назариялари ва сиёсий талқинларнинг олдини ололмади.

Линдси Грэм 2003 йилдан буён АҚШ Сенатида Жанубий Каролина штатидан вакиллик қилиб келаётган эди. Республикачилар партиясининг энг тажрибали арбобларидан бири бўлган Грэм мудофаа, ташқи сиёсат ва миллий хавфсизлик масалаларидаги қатъий позицияси билан танилган. У АҚШнинг Украина, НАТО ва иттифоқчиларни қўллаб-қувватлаш сиёсатининг фаол тарафдорларидан бири бўлган. Дастлаб Дональд Трампнинг кескин танқидчиларидан бўлган сенатор кейинчалик унинг энг яқин сиёсий иттифоқчиларидан бирига айланди ва Республикачилар партиясида муҳим таъсирга эга шахс сифатида қараларди.

Гремнинг ўлими дастлаб “кутилмаган касаллик” сифатида эълон қилинди. Бу эса ижтимоий тармоқларда турли тахминларнинг пайдо бўлишига сабаб бўлди. Айрим фойдаланувчилар унинг ўлимини сиёсий фаолияти билан боғлашга уринди, бошқалар эса фитна назарияларини илгари сурди.

Россиялик ультрамиллатчи мафкурачи ва Кремль тарғиботчиларидан бири Александр Дугин Грэмнинг ўлими оддий тасодиф эмаслигини иддао қилди. Унинг фикрича, сенаторнинг вафоти Дональд Трампга қаратилган “қора ишора” бўлиши мумкин. Дугин бу даъвосини ҳеч қандай далил билан тасдиқламади, бироқ унинг баёноти Россияпараст ахборот майдонида кенг тарқалди.

“Линдси Грэмнинг тўсатдан ўлими Трампга юборилган қора белги бўлиши мумкин. Бу очиқчасига: “Навбат сеники”, деган маънони англатади. Линдси Грэм Трампнинг сояси, унинг қоронғи алтер эгоси эди”, дея ёзган Дугин.

Бошқа бир конспирологлар гуруҳи эса, кекса сиёсачининг ўлими ортида Исроил тургани ҳақидаги фикрларни илгари сурмоқда. Интернетта тарқалган назарияларга кўра, АҚШ ҳукуматининг Эронга нисбатан юмшоқ сиёсати ва урушни якунлашга интилиши, шунингдек, Трампнинг Нетаньяҳуга нисбатан билдирган кескин муносабатлари сабаб Исроилнинг Моссад разведкаси ушбу ўлимни уюштирган ҳамда Оқ уй вакилларига, жумладан Трампга ўзига хос сигнал берган. Аммо бу назарияларнинг ҳеч бири аниқ тасдиқ топмаганини унутмаслик керак. Марҳумнинг яқинлари ва тиббиёт мутахассислари эса ўлим табиий бўлганини тасдиқлаган.

Сенаторнинг вафотидан сўнг, унинг ўрнини ким эгаллаши масаласи ҳам тезда ҳал қилинди. 13 июль куни Жанубий Каролина губернатори Генри Макмастер Линдси Грэмнинг синглиси Дарлин Грэм Нордонни Сенатдаги бўшаган ўринга вақтинча тайинлади. У акасининг ваколат муддати тугагунига қадар сенатор сифатида фаолият юритади. Мазкур тайинлов АҚШ Сенати тарихида вафот этган сенатор ўрнига унинг туғишган синглиси тайинланган илк ҳолатлардан бири сифатида қайд этилди.

Дарлин Грэм сиёсатда фаол лавозим эгалламаган бўлса-да, акасининг сайлов кампанияларида мунтазам иштирок этган ва унинг энг яқин маслаҳатчиларидан бири сифатида танилган. АҚШ Президенти Дональд Трамп ҳам унинг номзодини очиқ қўллаб-қувватлаб, келгусида Сенатдаги ўрин учун ўтказиладиган махсус сайловда қатнашишга чақирди.