Таиланддан Ўзбекистонга 7,5 кг наркотик олиб кирган шахс ушланди

Таиланддан Ўзбекистонга 7,5 кг килограммдан ортиқ наркотик моддаларни олиб кириш ва тарқатишга уриниш аниқланди. Бу ҳақда Божхона қўмитаси хабар берди.

Қайд этилишича, жорий йилнинг 5 сентябрь куни Божхона қўмитасининг “Тошкент-АЭРО” ихтисослаштирилган божхона комплекси тезкор тузилмалари ҳамда “Тошкент халқаро аэропорти” чегара божхона пости ходимлари ДХХ билан ҳамкорликда тезкор тадбир ўтказган.

Таиланддан учиб келган 51 ёшли Ўзбекистон фуқаросининг юклари божхона назоратидан ўтказилган. Текширув вақтида унинг багажидаги учта вино шишаси ва қадоқланган зираворлар ўрами ходимларда шубҳа уйғотган.

Мазкур моддалар Божхона қўмитасининг Марказий божхона лабораториясида экспертизадан ўтказилган. Натижада шишалардаги тўқ жигарранг, ўткир ҳидли модда таркибида тетрагидроканнабинол мавжудлиги аниқланиб, унинг Ўзбекистонда муомаласи тақиқланган наркотик восита – “гашиш мойи” экани маълум бўлган. Унинг умумий оғирлиги 7 килограмм 580 граммни ташкил қилган.

Тезкор суриштирувлар давомида фуқаро Telegram’даги “Абсолют” номи остида фаолият юритувчи “куратор” кўрсатмасига биноан 1800 АҚШ доллари эвазига наркотик моддаларни Ўзбекистонга олиб кириб, Самарқандга етказиб бериши керак бўлгани аниқланган.

Шундан сўнг, тезкор тадбир Самарқанд шаҳрида давом эттирилган. Наркотик моддаларни қабул қилиб олиши керак бўлган 47 ёшли фуқаро ҳам қўлга олинган. Унинг яшаш манзили холислар иштирокида кўздан кечирилганда, вино шишалари, идиш ювиш гели қутиси ва шприцларга жойланган “гашиш мойи” аниқланган. Шунингдек, истеъмол қилинганда сархушлик ҳолатини келтириб чиқарувчи қуритилган қўзиқоринлар ҳам топилган. Аниқланган наркотик моддаларнинг умумий оғирлиги қарийб 5,5 килограммни ташкил қилган.

Маълум бўлишича, 47 ёшли фуқаро Telegram’даги “Right Ktrel” аккаунти орқали топшириқ берувчи “куратор” кўрсатмасига биноан наркотик моддаларни манзилга етказиши ва кейинчалик тарқатиши керак бўлган.

Шу тариқа, кўп босқичли тезкор тадбир натижасида жами 13 килограмм 80 грамм “гашиш мойи”нинг ноқонуний айланмасига чек қўйилган.

Мутахассислар ҳисоб-китобига кўра, ушбу миқдордаги наркотик восита қарийб 200 минг кишини гиёҳвандликка жалб этиш учун етарли бўлган. Наркотик моддаларнинг қора бозордаги қиймати эса якуний истеъмолчига етиб боргунига қадар 1,7 миллион АҚШ долларидан ошиши мумкин эди.

Билдирилишича, ҳолат юзасидан божхона органлари томонидан жиноят иши қўзғатилган.

Эслатиб ўтамиз, аввалроқ “Тошкент-АЭРО” ихтисослаштирилган божхона комплексида қиймати 1,2 миллиард сўмдан ортиқ заргарлик буюмларини яширинча олиб ўтиш ҳолати аниқлангани ҳақда хабар берилган эди.