Таиландда ўқувчи аввал устозини, сўнг ўзини отиб ўлдирди (видео)

Бугун, 7 август куни Таиланднинг Бангкок шаҳри яқинидаги мактабда ўқувчи отишма содир этиб, бир ўқитувчини ўлдирди ва яна 4 кишини яралади. Бу ҳақда “The Guardian” хабар берди. 

Маълум қилинишича, гумонланувчи воқеадан сўнг ўз жонига қасд қилган.

Қайд этилишича, ҳодиса Нонтхабури провинциясининг Бангкруай туманида содир бўлган. Нонтхабури провинцияси полиция қўмондони, подполковник Дечрапее Конгдеенинг сўзларига кўра, қурбонлар ва жароҳатланганлар борлиги тасдиқланган. Унинг айтишича, отишма содир этганликда гумон қилинаётган ўқувчи кейинчалик ўз жонига қасд қилган.

Фавқулодда хизматлар тарқатган фотосуратларда Бангкокнинг шимоли-ғарбий чеккасида жойлашган Debsirin Nonthaburi мактабидан ўқувчилар чиқиб кетаётгани, воқеа жойида тез ёрдам машиналари ишлаётгани акс этган. Суратларнинг бирида бир кишининг тез ёрдам машинасидан ташқарида замбилда ётгани, яна бир жабрланувчига тиббиёт ходими ёрдам кўрсатаётгани кўринган. Бироқ ҳодиса сабаблари ҳақида ҳали маълумот берилмаган.

Гувоҳлардан бирининг айтишича, ўқувчилар бошқа бинодан ўқ овозларини эшитганларида синфхонада яшириниб олган, кейин эса полиция ходимлари эшикни тақиллатиб, уларнинг бинодан чиқиб кетишига йўл очган.

Туман маъмуриятининг маълумотларига кўра, 2025 ўқув йилида мактабда қарийб 3 100 нафар ўқувчи таҳсил олган ва 147 нафар ўқитувчи фаолият юритган.

Эслатиб ўтамиз, аввалроқ Бразилиянинг шимолий қисмидаги Акри штатида 13 ёшли ўқувчи мактабда содир этган отишма оқибатида икки аёл ҳалок бўлиб, яна икки киши жароҳат олган эди.