ССВ қишда тез тарқаладиган коксаки вирусидан огоҳлантирди (видео)

Куз-қиш мавсумида баъзи юқумли касалликлар билан касалланиш эҳтимоли ортади. Улардан биттаси коксаки касаллиги бўлиб, бу кўпроқ куз-қиш мавсумида тарқалади. Санитария-эпидемиологик осойишталик ва жамоат саломатлиги қўмитаси раисининг биринчи ўринбосари Нурмат Отабеков ушбу касаллик ҳақида маълумот берди.

Унинг айтишича, коксаки Ўзбекистонда алоҳида касаллик сифатида ҳисобга олинмайди. Негаки, бу энтеровирусларнинг бир тури бўлганлиги учун энтеровирус касалликлар ҳисобга олинган пайтда, орасида бу касаллик ҳам қайд этилиши мумкин. У ўткир ичак инфекциялари сингари кечади. Баъзан респиратор белгилар ичак белгилари билан бирга кечиши мумкин. Умуман олганда, коксаки вирусининг 70 га яқин тури бор. Лекин асосан А ҳамда Б турлари учрайди.

Касалланганларнинг аксарияти касалликни енгил ўтказади. Уларда жиддий белгилар бўлмаслиги мумкин. Агар бемор коксаки вирусининг А тури билан касалланган ҳолат бўладиган бўлса, юзда, лабда, бурунда, бармоқларда пуфакчалар пайдо бўлиш эҳтимоли бор. Лекин агар унинг Б тури билан касалланган бўлса, унда ичак белгилари, баъзи ҳолатларда паренхима аъзоларда у ёки бу белгилар пайдо бўлиши мумкин. Гап шундаки, касаллик асосан енгил кечади. Беморлар ўзларини касалликка чалинганини ҳатто сезмасликлари ҳам мумкин. Лекин баъзи ҳолатларда у жиддий асоратлар – зотилжам, менингит кабиларни ҳам келтириб чиқариш эҳтимоли бор.

“Шундай экан, биз бу касалликни гумон қилинган тақдирда беморларига симптоматик даво нуқтаи назардан ёндашишимиз керак бўлади. Энди бу касаллик дастлаб Америка Қўшма Штатларининг Коксаки шаҳрида аниқланганлиги учун коксаки вируси деб номланган. Лекин бугунги кунга келиб, айтайлик, ўша тўрт кундан ортиқ ёки бўлмаса узоқ муддат иситмалаган одамларни ушбу касалликка чалинган деб эҳтимол қилиш мумкин. Лекин касаллик асосан енгил ва респиратор белгилар билан кечадиган, асоратлар жуда кам учрайдиган касаллик бўлиш эҳтимоли бор”, дейди Нурмат Отабеков.

Унинг айтишича, шу нуқтаи назардан, ушбу касаллик бўйича вазиятдан ёки бўлмаса оммавий ахборот воситаларида тарқалаётган маълумотлардан зинҳор хавотирланишга ҳеч қанақа асос йўқ. Негаки, у Ўзбекистон ҳудудига унчалик хос бўлмаган касаллик ҳисобланади. Аксарият ҳолларда Европа, Лотин Америкаси ва Америка ҳудудидаги ғарб давлатларида кўпроқ қайд этилади. Бунда оддий санитария-гигиена қоидаларига риоя қилиш, қўлни яхшилаб ювиш, касаллик белгилари бўладиган бўлса, мулоқотдан тийилиш асосий омиллардан бири бўлиши мумкин.