Собиқ вазирнинг повербанки самолёт бортида портлаб кетди (видео)

Нидерландиянинг собиқ транспорт вазири ҳамда KLM авиакомпаниясининг собиқ раҳбари Камиль Эйрлингснинг портатив аккумулятори Амстердамдан Кюрасаога парвоз қилаётган йўловчи самолёти бортида ёниб кетди. Бу ҳақда бугун, 19 сентябрь куни “RTL Nieuws” телеканали хабар берди.

“KLM компанияси самолёти бортида KLM собиқ президенти ва бош директори Камиль Эйрлингсга тегишли портатив аккумулятор ёниб кетди”, дейилади хабарда.

Маълум бўлишича, Эйрлингс енгил жароҳат олган. У парвоз вақтида повербанкни қувватлашга қўйган, ваҳоланки KLM қоидалари бортда портатив аккумуляторларни қувватлашни тақиқлайди. Ҳодисадан сўнг Амстердамдан Кюрасао оролига рейс бажараётган Boeing ортига қайтарилган.

Эйрлингснинг ёнида ўтирган гувоҳ “RTL Nieuws” телеканалига “тўсатдан қарсиллаган овоз эшитилганини”, шундан сўнг дарҳол ёнғин чиқиб, ўриндиқ тепасида катта аланга пайдо бўлганини айтган. Унинг сўзларига кўра, ҳамма қаттиқ саросимага тушган, бироқ борт кузатувчилари тезда йўловчиларни тинчлантирган.

Эслатиб ўтамиз, аввалроқ Эронда Sepehran Airlines авиакомпаниясининг Boeing 737 русумли самолёти ҳавога кўтарилганидан кўп ўтмай унинг шиналаридан бири ёрилиб кетганди.