“Сити” ярим ҳимоячиси жамоа билан янги шартнома имзолади

“Манчестер Сити” ярим ҳимоячиси Фил Фоден клуб билан 2030 йилга қадар мўлжалланган янги тўрт йиллик шартнома имзолади. Бу ҳақда клуб расмий сайти хабар берди.

26 ёшли футболчи “Манчестер Сити” тарбияланувчиси ҳисобланади. У клуб академиясига тўққиз ёшида қабул қилинган ва болалигидан “шаҳарликлар” мухлиси бўлиб келган.

Фоден 2017 йилда Пеп Гвардиола қўл остида асосий жамоада дебют қилган. Шундан буён у клуб тарихидаги энг кўп соврин қўлга киритган футболчилардан бирига айланди.

“2026 йил май ойида Фоден “Манчестер Сити” сафида Премьер-лигада 100 та гол урган олтинчи футболчига айланди. Шунингдек, у клубнинг 132 йиллик тарихида 100 голлик маррани забт этган атиги 20 футболчидан бири бўлди”, дейилади клуб баёнотида.

Англиялик футболчи “Манчестер Сити” билан жами 20 та йирик совринни қўлга киритган. Улар орасида олтита Англия Премьер-лигаси чемпионлиги, бешта Лига кубоги, учта Англия кубоги, учта Англия Суперкубоги, шунингдек, Чемпионлар лигаси, UEFA Суперкубоги ва Клублар ўртасидаги жаҳон чемпионлиги бор.

Фоден жамоавий ютуқлардан ташқари бир қатор нуфузли шахсий совринларга ҳам сазовор бўлган. У 2023-2024 йилги мавсумда Англия профессионал футболчилар ассоциацияси талқинига кўра йилнинг энг яхши футболчиси, Футбол ёзувчилари ассоциацияси талқини бўйича йилнинг энг яхши ўйинчиси ва Премьер-лигада мавсумнинг энг яхши футболчиси деб топилган.