Швеция Бош вазири истеъфога чиқишини эълон қилди

Швеция Бош вазири Ульф Кристерссон мухолифат ғалаба қозонган парламент сайловларидан сўнг уни лавозимидан озод этишларини сўради. Бу ҳақда у бугун, 17 сентябрь куни ўзининг X ижтимоий тармоғидаги саҳифасида ёзди. 

Кристерссоннинг сўзларига кўра, овоз бериш натижалари янги ҳукуматни шакллантириш жараёнини мураккаблаштириши мумкин.

“Сайлов натижалари кейинги ҳукуматни шакллантириш учун мураккаб шароитни юзага келтириши мумкин, чунки партияларнинг овоз бериш кунидан олдин берган турли баёнотлари ҳукумат ва коалицияларни шакллантириш бўйича барча эҳтимолий номзодлар учун тўсиққа айланиши мумкин”, дейилади баёнотда.

Кристерссон Швеция парламенти спикери Андреас Норлен янги ҳукуматни шакллантириш йўлида зарур қадамларни ташлаши кераклигини билдирган.

“Ушбу иш дарҳол бошланиши учун мен шу билан мени Бош вазир лавозимидан озод этишларини сўрайман”, деб ёзган у ўз баёнотида.

Маълумот учун, жорий йилнинг 13 сентябрь куни Швецияда парламент сайловлари бўлиб ўтди. Унда мухолифатдаги сўл-марказчи блок 49,5 фоиз овоз тўплади, Кристерссон бошчилигидаги ҳукумрон ўнг блок эса 48,8 фоиз овоз йиғди.

Собиқ бош вазир Магдалена Андерссон бошчилигидаги Швеция Социал-демократик ишчи партияси, Сўл партия, Марказ партияси ва Атроф-муҳитни муҳофаза қилиш партиясидан (яшиллар) иборат Сўл блок парламентда 176 та ўринга эга бўлди.

Қолган 173 та ўринни Кристерссон бошчилигидаги Модераторлар коалицион партияси, “Христиан-демократлар”, “Либераллар” ҳамда ҳукуматни қўллаб-қувватловчи ўнг-популистик “Швеция демократлари” партиясидан иборат Ўнг блок эгаллайди.