Шавкат Мирзиёев Олтинкўлдаги пахта даласига борди

Бугун, 23 сентябрь куни Президент Шавкат Мирзиёев Андижон вилоятига ташрифи чоғида Олтинкўл туманида Шинжон усули асосида пахта етиштириш жараёнини кўздан кечирди. Бу ҳақда Президент матбуот хизмати хабар берди.

Қайд этилишича, пахтачиликда Шинжон усулининг қўлланилиши ҳосилдорликни сезиларли ошириш билан бирга сув, ўғит ва бошқа ресурсларни тежаш, ғўзани парваришлаш харажатларини камайтириш имконини бермоқда. Пахта етиштирилаётган “Агрокластер Олтинкўл” корхонасининг умумий экин майдони 850 гектарни ташкил этади. Шундан 23 гектарида Шинжон усули асосида пахта етиштириш йўлга қўйилган.

Шинжон технологиясида чигит плёнка остига қўш қаторлаб экилади. Бу тупроқ намлиги ва ҳароратини барқарор сақлашга, чигитнинг эрта ва бир текис униб чиқишига хизмат қилади. Томчилатиб суғориш ва озиқлантириш тизими орқали сув ҳамда ўғит бевосита ғўза илдизига етказилади. Натижада ортиқча сарфнинг олди олиниб, сув 40 фоизгача, ўғит эса қарийб 30 фоизга тежалади.

Анъанавий усулда бир гектар майдондан ўртача 30-35 центнер пахта олинса, Шинжон технологиясида ушбу кўрсаткич 60-70 центнерга етади. Плёнка остида шаклланган қулай микроиқлим туфайли ҳосилни анъанавий майдонларга нисбатан 10-15 кун эртароқ йиғиб олиш мумкин. Корхонада агротехник тадбирларнинг асосий қисми агродронлар ёрдамида бажарилмоқда. Бу махсус техникалардан фойдаланиш эҳтиёжини ва ёқилғи сарфини кескин камайтирмоқда.

Давлат раҳбарига лойиҳанинг натижалари, иқтисодий самарадорлиги ва мазкур технологияни янада кенгайтириш режалари ҳақида ахборот берилган.