Севгилисининг маъшуқасини ўлдирган маҳбус 2 доза ўлим дорисидан кейин ҳам тирик қолди

АҚШнинг Теннесси штатида 1995 йилда қотиллик содир этгани учун ўлим жазосига ҳукм қилинган Криста Гейл Пайк икки доза ўлимга олиб келувчи препарат юборилганига қарамай, тирик қолди. 50 ёшли маҳбус қатл хонасидан тез ёрдам машинасида шифохонага олиб кетилди. Бу ҳақда CNN хабар берди. 

Маълум қилинишича, Пайк бугун, 1 октябрь куни соат 10:00 да қатл этилиши керак эди. Бироқ унга икки марта пентобарбитал юборилганига қарамай, у вафот этмаган. Қатлни кузатган ОАВ вакилларининг айтишича, Пайк жараён давомида ҳушёр бўлган, бир пайт бошини кўтариб, қамоқхона ходимларидан қўли шундай ҳис қилиниши керакми, деб сўраган.

Иккинчи доза соат 20:26 да юборилган. Шундан кейин ҳам Пайкнинг хуррак отаётгани эшитилган. Соат 20:53 да қатл хонасидаги микрофон ўчирилиб, ОАВ вакилларига ҳудудни тарк этиш айтилган.

Пайкнинг адвокатлари унинг тирик қолганини тасдиқлаган. Уларнинг сўзларига кўра, маҳбус қамоқхонадан тез ёрдам машинасида шифохонага олиб кетилган, бироқ адвокатларга унинг ҳозирги аҳволи ҳақида маълумот берилмаган.

Ўлим жазоси бўйича экспертлар мазкур ҳолатни мисли кўрилмаган деб атаган. Ўлим жазоси ҳақида маълумот берувчи марказ ижрочи директори Робин Маҳернинг айтишича, АҚШда 7 нафар маҳбус қатл жараёнида вена топилмагани сабабли тиббий муаммолардан омон қолган. Бироқ ҳеч ким ўлимга олиб келувчи препаратлар юборилганидан кейин тирик қолмаган.

Теннесси штатининг қатл протоколида биринчи дозадан кейин маҳбус вафот этмаса, иккинчи дозани юбориш белгиланган. Бироқ иккинчи дозадан кейин ҳам маҳбус тирик қолса, қандай чоралар кўрилиши протоколда кўрсатилмаган.

Мазкур воқеадан сўнг Теннесси губернатори Билл Ли йил охиригача режалаштирилган барча қатлларни тўхтатган. У ҳодиса юзасидан “айнан нима содир бўлганини аниқлаш учун учинчи томон иштирокида кенг қамровли текширув” ўтказилишини буюрганини маълум қилган.

“Теннесси аҳолиси қатл жараёни нафақат қонуний ва Конституцияга мос, балки самарали тарзда амалга оширилишини кутади”, деган губернатор.

Теннесси Тузатиш ишлари департаменти эса қатл жараёнида штатда белгиланган ва Бош прокуратура томонидан тасдиқланган барча тартибларга амал қилинганини билдирган.

Пайк дастлаб 1 октябрь куни эрталаб қатл этилиши керак эди. Бироқ жараён бошланишидан тахминан бир соат олдин АҚШ Олтинчи округ апелляция суди 2 га қарши 1 овоз билан қатлни вақтинча тўхтатган. Суд Пайкнинг болалик даврида жинсий зўравонликка учрагани ҳақидаги даъволари ҳукм чиқариш вақтида етарлича ҳисобга олинган-олинмаганини кўриб чиқиш учун вақт кераклигини билдирган.

Бош прокуратура бу қарор устидан АҚШ Олий судига шикоят қилган. Кейинчалик Олий суд қатлни давом эттиришга йўл очган. Суддаги 3 нафар либерал судья қарорга қарши чиққан. Судья Соня Сотомайор Пайкнинг даъволари чуқурроқ кўриб чиқилиши кераклигини билдирган.

Пайкнинг адвокатлари эса қатл жараёни давомида унинг “кераксиз азоб” чекаётганини билдириб, АҚШ Олий судига фавқулодда ариза киритган. Улар маҳбусга ҳаётини сақлаб қолишга қаратилган тиббий ёрдам кўрсатилиши кераклигини ҳам сўраган.

Маълумотларга кўра, Пайк 1995 йил 12 январь куни 19 ёшли Колин Слеммерни ўлдирган. Прокурорларнинг айтишича, у Слеммерни ўз йигитини олиб қўйишга уринаётганидан хавотирланиб, ўрмонзор ҳудудга алдаб олиб борган. Пайк Слеммерни канцелярия пичоғи билан пичоқлаб, асфальт бўлаги билан урган.

Жиноят пайтида Пайкнинг йигити Шипп 17 ёшда бўлган. У Слеммернинг танасига пентаграмма –
шайтонпарастлик билан боғлиқ юлдузсимон белги ўйиб туширганини тан олган. Шипп умрбод қамоқ жазосига ҳукм қилинган ва шартли равишда озодликка чиқиш имкониятига эга бўлган. Пайк эса ўлим жазосига ҳукм қилинган.

Қотилликдан сўнг Пайкда биполяр бузилиш ва травмадан кейинги стресс бузилиши ташхиси қўйилган. Унинг тарафдорлари жиноят содир этган пайтда 18 ёшда бўлганини, руҳий касаллиги ва болаликдаги оғир жинсий зўравонлик ҳақидаги даъволари ҳисобга олиниши кераклигини айтмоқда.

Пайк эса қотилликни содир этганини инкор этмайди. У афв этиш ҳақидаги мурожаатида Слеммер билан фақат жанжаллашмоқчи бўлганини, бироқ вазият назоратдан чиқиб кетганини айтган.

Слеммернинг онаси Мей Мартинес эса Пайкнинг ўлим жазоси ижро этилишини ўнлаб йиллардан бери кутиб келган. У қатл жараёнини кузатиш учун эри билан Флоридадан Теннессига боришга тайёрланган.

АҚШ Олий суди 1976 йилда ўлим жазосини қайта тиклаганидан бери мамлакатда 18 нафар аёл қатл этилган. Бу барча қатлларнинг қарийб 1 фоизини ташкил этади.

Агар Пайкнинг қатли муваффақиятли амалга оширилганида, у жорий йилда АҚШда қатл этилган 30-шахс ва Теннесси штатида 200 йилдан ортиқ вақт ичида қатл этилган илк аёл бўларди.