Сертификат эвазига пора олган Санэпидқўмита мансабдори ушланди

Сурхондарёда туман санитария-эпидемиологик осойишталик ва жамоат саломатлиги бўлими бошлиғи 42 нафар мактаб ходимига санитария сертификати олиб беришни ваъда қилиб, 2,1 млн сўм олаётган вақтда ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Маълум қилинишича, Бош прокуратура ҳузуридаги Департаментнинг Шўрчи тумани бўлими ходимлари томонидан ўтказилган тезкор тадбирда Шўрчи тумани санитария-эпидемиологик осойишталик ва жамоат саломатлиги бўлими бошлиғи Э. Э. нинг ноқонуний фаолияти аниқланган. У тумандаги мактабгача таълим ташкилотларидан бирининг раҳбари С. Х. га мактабгача таълим ташкилотининг 42 нафар ходимига санитария сертификатларини беришини ваъда қилиб, ундан 2,1 млн сўмни олган вақтида ашёвий далиллар билан қўлга олинган.

Билдирилишича, мазкур ҳолат юзасидан Жиноят кодексининг 210-моддаси (Пора олиш) билан жиноят иши қўзғатилиб, тергов ҳаракатлари ўтказилмоқда.

Эслатиб ўтамиз, аввалроқ Андижонда тижорат банкининг ҳудудий бошқармасида ишловчи бош мутахассис фуқаронинг хорижга чиқишига қўйилган тақиқни ечиб бериш эвазига 5,5 миллион сўм олаётган вақтида ушланганди.