Россияда ўзбекистонлик таксичи 5 йилга қамалди

Россиянинг Владивосток шаҳрида эркакни бейсбол таёқчаси билан уриб, оғир жароҳат етказган Ўзбекистон фуқароси 5 йилга озодликдан маҳрум қилинди. Бу ҳақда “Главные Новости” хабар берди.

Қайд этилишича, ҳодиса 2025 йил ноябрь ойида содир бўлган. Такси ҳайдовчиси бўлиб ишлаган 18 ёшли йигит йўловчи билан жанжаллашиб қолган. Суд материалларига кўра, у автомобиль юкхонасидан бейсбол таёқчасини олиб, эркакнинг бош қисмига камида уч марта зарба берган. Оқибатда жабрланувчи оғир тан жароҳатлари, жумладан, очиқ бош мия жароҳатини олган ва шифохонага ётқизилган.

Воқеадан кейин ҳайдовчи Приморье ўлкасидан қочиб кетган. Бироқ ҳуқуқ-тартибот органлари уни Кемерово вилоятида қўлга олиб, Владивостокка қайтарган.

Суд Ўзбекистон фуқаросини қасддан оғир тан жароҳати етказишда айбдор деб топиб, уни умумий тартибли колонияда 5 йил муддатга озодликдан маҳрум қилган. Шунингдек, у жабрланувчига маънавий зарар учун 1 миллион рубль товон пули тўлаши белгиланган.

Эслатиб ўтамиз, аввалроқ АҚШнинг Огайо штатида 42 ёшли ўзбекистонлик юк машина ҳайдовчиси Беҳзод Асроров автоҳалокат оқибатида коллеж футболчиси бўлган 21 ёшли Тобиас Форсайтнинг ўлимига сабаб бўлганди.