Россия ЖССТга Иркутскда ўлат йўқлигини маълум қилди

Кеча, 6 октябрь куни Россия ҳукумати Жаҳон соғлиқни сақлаш ташкилотига Сибирнинг Иркутск шаҳрида ўлат илмий-тадқиқот институти лаборанти вафот этганидан сўнг ўлат ҳолатлари қайд этилмаганини маълум қилди. Бу ҳақда “Reuters” хабар берди.

ЖССТ вакили Кристиан Линдмайер кеча, 6 октябрь куни Женевадаги брифингда ташкилот сўровига Россия ҳукуматининг расмий жавобини ўқиб эшиттирган.

“Россия Федерациясининг Иркутск шаҳрида ушбу хавфли касалликнинг бирорта ҳам ҳолати қайд этилмаган”, дейилади жавобда.

Линдмайернинг сўзларига кўра, марҳума билан мулоқотда бўлганларнинг барчаси аниқланган ва назорат остида. Шу вақтгача уларнинг ҳеч бирида касаллик симптомлари пайдо бўлмаган. ЖССТ Иркутск учун хавфни “ўртачадан пастгача”, Россиянинг қолган ҳудудлари учун – “паст”, Европа учун эса – “жуда паст” деб баҳолаган.

Кеча, 6 октябрь куни Роспотребнадзорнинг ҳудудий бошқармаси интернетда тарқалаётган Иркутск вилоятида кучайтирилган санитария-эпидемиология режими ва қаътий чекловлар жорий этилгани ҳақидаги ҳужжатни рад этган. Идора бундай қарорлар қабул қилинмаганини билдирган. Вилоятда, Иркутск ва Шелеховда вазият осуда экани айтилган.

Эслатиб ўтамиз, жорий йил 2 октябрга ўтар кечаси Шелехов туман шифохонасида ўлатга қарши институтда ишлаган 28 ёшли Дарья Шипилова вафот этганди. ОАВ унинг ўлимини ўпка ўлати билан зарарланишга боғлади. 1 октябрь куни шифохонанинг бир нечта бўлимларида беморларни қабул қилиш ва чиқариш тўхтатилди. Аёл билан мулоқотда бўлган 197 киши тиббий назоратга олинди.

4 октябрь куни Роспотребнадзор ходимда ноаниқ этиологияли пневмония – келиб чиқиши аниқланмаган ўпка яллиғланиши бўлганини маълум қилди. Идора маълумотларига кўра, унинг таҳлилларида касбий фаолияти билан боғлиқ микроорганизмлар топилмаган. Аёл билан мулоқотда бўлганларда COVID-19 ва риновирус инфекциясининг иккитадан ҳолати аниқланган. Бошқа қўзғатувчилар топилмаган.

6 октябрь куни Шелехов тумани раҳбари ўринбосари Елена Софина “хавфли ташхис” тасдиқланмаганини айтган. Унинг сўзларига кўра, эҳтиёт чораси сифатида карантинга жойлаштирилган одамларнинг 60 фоизи аллақачон қўйиб юборилган. Маҳаллий ОАВ аввалига чекловлар 200 га яқин кишига таъсир қилганини хабар қилган эди.

Иркутск вилоятидаги ўлат ҳақидаги хабарлар фонида Марказий Осиё мамлакатлари чегарада санитария назоратини кучайтиришни бошлади. Россия билан қуруқликдаги чегарасига эга бўлмаган Ўзбекистон ҳукумати бундай чораларни 3 октябрь куни жорий этди. Сўнгра Қозоғистон ва Қирғизистон ҳам кучайтирилган санитария-карантин назоратини ўрнатди.