Россия ва Украина қаерда музокара ўтказиши маълум бўлди

Россия, Украина ва АҚШ делегациялари ўртасидаги музокараларнинг навбатдаги раунди БАА пойтахти Абу-Дабида ёки Швейцарияда бўлиб ўтиши мумкин. Бу ҳақда америкалик мулозимларга таяниб, “Sky News” ва “Reuters” хабар берди.

Манбаларнинг маълумотларига кўра, учрашув катта эҳтимол билан яқин икки ҳафта ичида бўлиб ўтади. “Sky News” суҳбатдошининг аниқлик киритишича, музокаралардан мақсад кейинчалик етакчилар даражасидаги учрашувни ўтказиш ҳисобланади, бироқ бунинг учун ҳали жуда катта ҳажмдаги ишларни амалга ошириш зарур.

“Reuters”нинг ёзишича, ўтган куни Украина Президенти Владимир Зеленский ҳам Россия, Украина ва АҚШ музокарачилари ноябрь ойининг биринчи ярмида Абу-Дабида техник даражада учрашишга келишиб олганини маълум қилган. У, шунингдек, бундан сўнг ушбу мамлакатлар етакчиларининг учрашуви бўлиб ўтишига умид билдирган.

Жорий йилнинг 21 октябрь куни Россия Президенти Владимир Путин Санкт-Петербург шаҳрида Америка етакчисининг махсус вакили Стив Уиткофф билан музокаралар ўтказган. Учрашувнинг асосий мавзуси Украинадаги низони бартараф этиш бўлган.

Учрашувдан сўнг Президент ёрдамчиси Юрий Ушаков Россия, АҚШ ва Украинанинг уч томонлама музокараларининг янги раунди 2026 йил ноябрь ойи ўрталарида Абу-Дабида бўлиб ўтиши мумкинлигини маълум қилган. Унинг сўзларига кўра, Москва музокаралар жараёнини ойнинг биринчи ярмида қайта бошлашга тайёр. Президент матбуот котиби Дмитрий Песков кейинроқ томонлар учрашув майдони сифатида Абу-Дабини кўриб чиқаётганини айтган.

Ушаков, шунингдек, музокаралардаги Россия делегацияси таркибига Президент ёрдамчиси Владимир Мединский ва ҳарбий қўмондонлик вакиллари кириши мумкинлигини истисно этмаган.

Путиннинг ўзи Украина бўйича уч томонлама музокараларни қайта бошлаш ҳақидаги келишувга АҚШ маъмурияти вакиллари билан мулоқотлар давомида эришилганини тасдиқлаган. Унинг сўзларига кўра, учрашувдан мақсад тинчлик келишувларига эришилганидан сўнг Украина ва Россия хавфсизлигини таъминлаш масаласини муҳокама қилишдан иборат бўлади.

Эслатиб ўтамиз, Россия, Украина ва АҚШ ўртасидаги дастлабки учта уч томонлама музокаралар раунди 23–24 январь, 4–5 ва 17–18 февраль кунлари бўлиб ўтган эди. Навбатдагиси 5–8 март кунлари БАА пойтахтида ўтказилиши режалаштирилганди, бироқ АҚШнинг Эронга қарши операцияси бошлангани сабабли уни қолдиришга тўғри келди.

Абу-Дабидаги дастлабки икки раунд давомида Россия делегациясига Бош штаб Бош бошқармаси бошлиғи адмирал Игорь Костюков бошчилик қилган. Унинг таркибига Мудофаа вазирлиги вакиллари ҳам кирган эди.