Россия Киевдаги кўприкларни бомбалаяпти: Днепр орқали ўтган асосий йўллар ёпилди

Жорий йилнинг октябрь ойи бошидан буён Россия қўшинлари Киевдаги Днепр дaрёси орқали ўтган кўприкларга реактив учувчисиз учиш аппаратлари қўллаган ҳолда кетма-кет зарбалар беришни бошлади. Асосий мақсад – Украина пойтахтининг ўнг ва чап қирғоқлари ўртасидаги логистика таъминоти йўлларини издан чиқариш.

Илк зарбалар 1 октябрь куни Жанубий кўприкка берилди. Икки сутка давомида объектга камида бешта зарба қайд этилди. Оқибатда йўлнинг қатнов қисми, тиргаклардан бири ва метрополитен линиясининг бетон тўсиғи шикастланди. Кўприк автомобиллар ва метро поездлари ҳаракати учун ёпилди.

3 ва 4 октябрь кунлари Шимолий кўприкка зарбалар берилди. Дронлар йўл қопламаси ва иссиқлик тармоғининг магистраль қувурларини шикастлади. Шикастланишлар сабабли пойтахт ҳокимияти Днепр орқали ўтган олтита автомобиль ўтказув йўлидан учтасида ҳаракатни чеклади ёки бутунлай ёпди.

Киев ҳудудида Днепр дaрёси орқали турли тўққизта кўприк ўтказилган:

• олтита автомобиль ва аралаш кўприк (Шимолий, Жанубий, Метро кўприги, Патон кўприги, Дарница ва Подольск-Воскресенск);
• иккита темир йўл кўприги;
• битта пиёдалар кўприги.

Бутун Украина ҳудуди бўйлаб Днепр дaрёси орқали 20 та амалдаги кўприк ўтказув йўли қурилган (бир қатор ҳарбий таҳлилчиларнинг баҳолашича, асосий магистраль ўтказув йўллари – 12 та). Кенг кўламли можаро давомида Днепр орқали ўтган камида бешта йирик автомобиль ва темир йўл кўприги жиддий шикастланган ёки бутунлай вайрон қилинган. Улар орасида Херсон вилоятидаги Антонов автомобиль ва темир йўл кўприклари, Новая Каховкадаги кўприк ўтказув йўли, шунингдек, Киевдаги Жанубий ва Шимолий кўприклар бор.

Кўприк ўтказув йўлларининг тизимли равишда нишонга олиниши Украина учун бир қатор жиддий хавфларни келтириб чиқармоқда. Хусусан, Киев кўприклари орқали мамлакат ғарбидан шарқий фронт чизиғига кетаётган ҳарбий ва гуманитар юкларнинг 90 фоизгача қисми ўтади. Тиргаклар ва йўл қопламаларининг шикастланиши асосий автотрассалар ўртасидаги ягона транспорт занжирини узиб қўймоқда.

Аҳолиси қарийб 3 миллион киши бўлган Киевда ўтказув йўлларининг ёпилиши кўп километрлик тирбандликларни келтириб чиқарган, қирғоқлараро такси нархлари эса тўрт-беш бараварга ошган. Аҳоли Днепрни шикастланган ҳудудлар орқали пиёда кесиб ўтишга мажбур бўлмоқда. Шимолий кўприкнинг нишонга олиниши иситиш мавсуми олдидан шаҳар иссиқлик тармоғининг шикастланишига олиб келган.

Украина Президенти Владимир Зеленскийнинг “Reuters”га берган интервьюсида айтишича, Украина Ҳаво ҳужумидан мудофаа тизимлари янги реактив дронларнинг қарийб 60 фоизини уриб туширмоқда, бу эса совуқ тушиши олдидан инфратузилманинг вайрон бўлиш хавфини оширади.

Маълумот учун, Днепр дaрёси Украина ҳудудини икки қисмга ажратиб туради ва Киев ҳудудида эни 1 минг 200 метргача етади. Совет даврида қурилган капитал кўприк ўтказув йўллари юқори мустаҳкамликка эга, бироқ реактив дронларнинг мунтазам аниқ зарбалари критик тугунларни, йўл қопламаси ва муҳандислик коммуникацияларини ишдан чиқармоқда.

Эслатиб ўтамиз, аввалроқ Владимир Зеленский Украина армияси Россия армиясининг янги тактикасига жавобан Россия нефтни қайта ишлаш заводларига бериладиган зарбаларни кучайтириши ҳақида хабар берилган эди.