Россия бюджет тақчиллигини қоплаш учун 1998 йилдан бери энг кўп олтин сотди

Россия Марказий банки бюджет тақчиллигини қоплаш учун захирадаги олтинни кетма-кет ўнинчи ой сотмоқда. Жорий йилда мамлакат бюджет тақчиллиги дастлабки режадан икки баравар ошиб, 7,3 триллион рублга етиши кутилмоқда. Бу ҳақда “The Moscow Times” хабар берди.

Россия Марказий банки маълумотларига кўра, сентябрь ойида мамлакатнинг олтин захираси яна 0,2 миллион трой унцияга, яъни қарийб 6,2 тоннага камайган. Натижада захиранинг умумий ҳажми 72,8 миллион трой унцияга тушган. Бу 2019 йил охиридан бери қайд этилган энг паст кўрсаткичдир.

Марказий банк декабрь ойида сўнгги бир неча ўн йилликдаги энг йирик олтин савдосини бошлаган. Ўшандан бери захирадаги олтин миқдори 2 миллион трой унцияга ёки қарийб 62 тоннага қисқарган.

Маълумот учун, трой унция – қимматбаҳо металлар, жумладан, олтин оғирлигини ўлчашда қўлланадиган бирлик ҳисобланади. Бир трой унция 31,1 граммга тенг.

Халқаро валюта жамғармаси статистик маълумотларига кўра, Россия замонавий тарихда олтин захирасини бундан тезроқ фақат 1998 йилда сотган. Ўшанда мамлакатда дефолт, валюта инқирози ва давлатнинг қисқа муддатли облигациялари пирамидасининг қулаши юз берган. Марказий банк уч ой ичида 3,8 миллион трой унция ёки 118 тонна олтин сотган. Бироқ йил охиригача олтин қуймаларининг бир қисми қайта сотиб олинган. Шу сабабли, 1998 йил якунида захира 1,6 миллион трой унцияга, яъни қарийб 50 тоннага камайган. Бу жорий йилдаги қисқаришдан кам.

Кейинги йилларда Россия олтин захирасини мунтазам ошириб борган. 1990 йилларнинг охиридан бошлаб захира ҳажми беш баравардан кўпроққа кўпайган. 2022 йил бошига келиб, мамлакатнинг олтин захираси 74 миллион трой унция ёки 2,3 минг тоннани ташкил этган. Бу кўрсаткич билан Россия дунёда бешинчи ўринда бўлган.

Ўтган йил охирида бошланган олтин савдоси Россия Марказий банкини дунёдаги энг йирик марказий банк олтин сотувчисига айлантирган. “Reuters” хабарига кўра, бу жараён Молия вазирлигининг Миллий фаровонлик жамғармаси активлари билан амалга оширган операцияларини такрорлаш билан боғлиқ. Яъни Марказий банк Молия вазирлиги бюджет тақчиллигини қоплаш учун аввалроқ сотган жамғарма олтинини бозорда сотмоқда.

“Finam” таҳлилчиси Александр Потавиннинг тушунтиришича, Молия вазирлиги даромадлар етишмаганида бюджет тақчиллигини қоплаш учун тўпланган захиралардан, жумладан, олтиндан фойдаланади. 2026 йилда нефть ва газдан тушадиган даромадлар камайгани сабабли Миллий фаровонлик жамғармаси активларини сотиш, шу жумладан, олтин савдоси ҳажми ошган.

Потавиннинг қайд этишича, Марказий банк олтин савдоси орқали валюта ликвидлиги етишмовчилигини ҳам қоплаши мумкин. Жаҳон бозорида олтин нархининг юқорилиги ҳам Россияни захирадаги олтинни кўпроқ сотишга ундаган бўлиши мумкин.

Қайд этилишича, Россияда сотилган олтиннинг бир қисми Хитойга олиб кетилмоқда. Хитой жорий йилда Россиядан олтин харид қилиш ҳажмини тарихий рекорд даражага етказган. Хитой божхона маълумотларига кўра, январь–июль ойларида Гонконгга Россияда ишлаб чиқарилган қарийб 100 тонна олтин етказилган. Бу ўтган йилнинг шу даврига нисбатан уч баравар кўп.

Дунёдаги энг йирик олтин савдо маркази бўлган Лондон бозори Россия олтини учун ёпилгач, россиялик етказиб берувчилар экспортни шарққа йўналтира бошлаган. Бу ҳақда LSEG таҳлилчиси Дебажит Саха маълум қилган.

“Financial Times” ҳисоб-китобларига кўра, Россиянинг Украинага қарши уруши бошланганидан кейинги биринчи йилнинг ўзидаёқ Россия олтини Хитойга катта ҳажмда оқиб кела бошлаган. Шундан бери Гонконг орқали 35 миллиард долларлик қимматбаҳо металл олиб чиқилган.