Россия АҚШ дипломатларига “чиқиш эшикларини кўрсатди”

АҚШнинг Россиядаги элчихонасига мамлакатда персона нон грата (исталмаган шахс) деб топилган америкалик дипломатлар рўйхати келтирилган нота топширилди. Бу ҳақда Россия ТИВ хабар берди.

Америка томони, шунингдек, Қўшма Штатларнинг ҳар қандай душманлик ҳаракатларига “қатъий ва адекват жавоб” берилиши ҳақида огоҳлантирилган.

“23 март куни ТИВга чақирилган АҚШнинг Москвадаги дипломатик миссиясининг юқори мартабали дипломатига Вашингтон томонидан Россиянинг БМТдаги (Нью-Йоркда жойлашган) доимий ваколатхонаси дипломатлари, шунингдек, БМТ Котибиятининг россиялик ходими мамлакатдан чиқариб юборилишига жавобан персона нон грата деб эълон қилинган америкалик дипломатлар рўйхати билан нота топширилди”, дейилади вазирлик баёнотида.

Москва нечта америкалик дипломатни ҳайдагани ҳақида маълумот берилмаган.

Эслатиб ўтамиз, АҚШ март ойи бошида Россиянинг БМТдаги доимий ваколатхонасининг 12 нафар ходимига мамлакатни тарк этишни буюрганди.