Роналду билан ҳамкорлик қиладиган агент Ҳусанов трансфери устида ишлайди

Португалиялик машҳур футбол агенти Жорже Мендеш Ўзбекистон терма жамоаси ва Франциянинг "Ланс" клуби ҳимоячиси Абдуқодир Ҳусановнинг Англия клубларидан бирига ўтиши масаласида иш олиб боради. Бу ҳақда “Get french football news” нашри хабар берди.

Манбага кўра, Мендеш Англиянинг “Манчестер Сити” ва “Тоттенхэм” жамоалари таклифлари билан қизиқиб, Ҳусановни айнан инглиз клубларига сотиш мажбуриятини олган. “Ланс” спорт директори Диего Лопес агентга бу борада топшириқ берган.

Қайд этилишича, “Ланс” Ҳусанов трансферидан камида 25-30 миллион евро ишлаб олмоқчи.

Маълумот учун, 58 ёшли Мендеш Криштиану Роналду, Радамель Фалькао, Анхель ди Мария, Диего Коста, Хамес Родригес, Андре Гомеш, мураббийлардан Жозе Моурино ва Луиз Фелипе Сколарининг агенти ҳисобланади.

Эслатиб ўтамиз, аввалроқ 20 ёшли Ҳусановга “Манчестер Сити”, ПСЖ ва “Атлетико” каби клублар қизиқиш билдираётгани хабар қилинганди.