Путин Европа давлатларини кескин огоҳлантирди

Европа қўшинларининг Украинага киритилиши Россия билан урушга олиб келади. Бу ҳақда Россия Президенти Владимир Путин Ҳиндистонда бўлиб ўтаётган BRICS саммити доирасида журналистларга маълум қилди.

“Улар ҳозир Украина ҳудудига қўшин киритиш ҳақида ўйлаётганини айтмоқда. Бу Россия билан урушни англатади“, деган у.

Путиннинг сўзларига кўра, Европа аҳолиси ўз раҳбарлари мамлакатларни можарога ундаётганини англаб етмоқда. Унинг фикрича, бу ҳолат Германияда “Германия учун муқобил“ партиясининг сайловлардаги сўнгги натижаларида ҳам ўз аксини топган.

“Менимча, ҳозир Европада умуман содир бўлаётган барча воқеалар Ғарб, Ғарб глобалистларининг сиёсат, хавфсизлик ва иқтисодиёт соҳасидаги тизимли хатоларининг натижасидир“, деган Путин.

Унинг айтишича, совуқ уруш тугаб, Совет Иттифоқи парчалангaч, Ғарб давлатлари ўзларини “Олимп чўққисида“ деб ҳис қилган ва уларга ҳамма нарса мумкин, деган хулосага келган. Путин бу хатолар “қор уюмидай катталашиб борганини“ таъкидлаган.

Россия Президенти, шунингдек, Ғарб давлатлари Кавказдаги сепаратизмни бевосита қўллаб-қувватлагани ва ҳозирги Украина инқирозини юзага келтирганини айтган. Москва НАТОнинг шарққа кенгайишини номақбул деб ҳисоблашини кўп маротаба билдирганини эслатган.

“Режим қонли давлат тўнтариши ёрдамида алмаштирилиши биланоқ, такрор айтаман, Украинани НАТОга олиб кириш мақсади қўйилди. Бу, охир-оқибат, бугунги Украинадаги фожиали воқеаларнинг асл сабабига айланди“, деган Путин.

Шу билан бирга, Путин Россия Европа давлатларига таҳдид солмаётгани ва бундай қилиш ниятида ҳам эмаслигини таъкидлади.

“Нима сабабдан? Ҳеч ким бизнинг Европа билан қандайдир можаро учун асосимиз йўқлиги ҳақида ўйламаяпти. Иккинчи жаҳон уруши натижаларига кўра, барча масалалар ҳал қилинган“, деган у.

Президент, шунингдек, Европа давлатларининг энергетика соҳасидаги хатолари улар учун газ нархларининг янада ошишига олиб келишидан огоҳлантирган.

Эслатиб ўтамиз, аввалроқ Россия Президенти Владимир Путин Украинадаги уруш давом этаётган бир пайтда НАТО давлатларидан бирига чекланган ҳужум уюштириб, альянснинг қатъиятини синаб кўриши мумкинлиги ҳақида хабар берилган эди.