Путин Ўзбекистон мустақиллигининг 35 йиллиги билан табрик йўллади

Россия Федерацияси Президенти Владимир Путин Ўзбекистон Президенти Шавкат Мирзиёевга ва мамлакат халқига давлат мустақиллигининг 35 йиллиги муносабати билан табрик йўллади. Бу ҳақда Ўзбекистон етакчисининг матбуот хизмати хабар берди. 

“Ўзбекистон Республикаси мустақиллиги эълон қилинганининг 35 йиллиги муносабати билан самимий табрикларимни қабул қилгайсиз. Мамлакатингиз иқтисодий ва ижтимоий ривожланиш йўлидан ишонч билан бормоқда ҳамда жаҳон майдонида ҳақли равишда юксак нуфузга эга”, дейилади табрикномада.

Шунингдек, қутлов хатида Россия – Ўзбекистон муносабатлари стратегик шериклик ва иттифоқчилик хусусиятига эга эканлиги ҳамда Москва ва Тошкент ўртасида барча асосий йўналишларда сермаҳсул шериклик, халқаро масалаларда самарали ўзаро ҳамкорлик йўлга қўйилгани ҳам қайд этилган.

“Ишончим комилки, биргаликдаги саъй-ҳаракатларимиз билан Россия ва Ўзбекистон дўст халқлари манфаатлари йўлида, минтақавий хавфсизлик ва барқарорликни мустаҳкамлаш мақсадида шериклик алоқаларининг бутун мажмуини янада кенгайтиришни таъминлаймиз. Сизга, ҳурматли Шавкат Миромонович, мустаҳкам соғлиқ ва муваффақиятлар, барча ватандошларингизга эса бахт-саодат ва равнақ тилайман”, деган Россия раҳбари.

Эслатиб ўтамиз, аввалроқ АҚШ Президенти Дональд Трамп Ўзбекистон Президенти Шавкат Мирзиёевга ва мамлакат халқига давлат мустақиллигининг 35 йиллиги муносабати билан табрик йўллаган эди.