Путин Украинадаги урушни тугатишни истаяпти – Трамп

АҚШ Президенти Дональд Трамп Россия Президенти Владимир Путин Украинадаги урушни якунлаш бўйича келишув тузишни исташини айтди. Бу ҳақда Трамп кеча, 9 сентябрь куни журналистларга Путин билан ҳафта бошида ўтказган телефон суҳбати ҳақида гапираётганида маълум қилди.

“У келишув тузишни хоҳлаяпти. Агар Зеленский ҳам келишув истаса, бу жуда яхши бўлар эди”, деган Трамп.

АҚШ Президенти Путин билан 9 сентябрь куни телефон орқали мулоқот қилган. Бу суҳбат Трампнинг махсус вакили Стив Уиткофф ва унинг куёви Жаред Кушнернинг Москва ҳамда Киевга дипломатик ташрифидан қайтганидан кўп ўтмай бўлиб ўтган.

Уиткофф ва Кушнер АҚШ номидан урушни якунлашга қаратилган асосий тинчлик музокараларида иштирок этмоқда. Томонлар можарони тугатиш бўйича эҳтимолий таклифларни муҳокама қилган.

Шунга қарамай, АҚШ, Украина ва Европадаги разведка расмийлари Путин урушни ҳақиқатан ҳам тугатишдан манфаатдор эканига ҳануз шубҳа билан қарамоқда.

Трамп Украина Президенти Владимир Зеленский ва Путин ўртасидаги муносабатлар ҳам музокараларга тўсқинлик қилаётганини айтган.

“Тўсиқ — бир-биридан нафратланадиган икки инсон”, деган Трамп Путин ва Зеленскийни назарда тутиб.

Унинг таъкидлашича, “ҳар қандай бошқа нарсадан кўра кўпроқ” айнан икки давлат раҳбарининг бир-бирига нисбатан муносабати урушни якунлаш жараёнини қийинлаштирмоқда.

Эслатиб ўтамиз, ўтган ойда АҚШ Марказий разведка бошқармаси директори Жон Рэтклифф ҳам Москвада Россия разведка идоралари вакиллари билан учрашганди. Ушбу мулоқотда Россия расмийларини Украинага қарши урушни якунлашга ундаш масаласи ҳам муҳокама қилинган.