Польшадаги шаҳар марказида даҳшатли отишма содир бўлди (видео)

Бугун, 7 ноябрь куни Польшанинг Краков шаҳридаги Бош бозор майдонида отишма содир бўлди. Маълумотларга кўра, беш киши ҳалок бўлган, ўндан ортиқ одам жароҳатланган. Бу ҳақда маҳаллий полиция хабар берди.

Вилоят полиция бошқармасига кўра, маҳаллий вақт билан соат 15:00 атрофида номаълум эркак майдонга автомашинада учиб кирган ва дуч келган одамларга қарата ўт очган. Отишма содир этган шахс қўлга олинган. У жароҳат олгани сабабли шифохонага етказилган.

“Onet” нашри маълумотларига кўра, эркак камуфляж кийимда бўлган ва ёлғиз ҳаракат қилган. Нашр манбасининг аниқлик киритишича, у армия намунасидаги узун соплоли милтиқдан ўт очган, унинг автомобилида эса кўп миқдорда бошқа қурол ва ўқ-дорилар топилган.

“Ички ишлар вазири фожиали отишмадан сўнг Краковдаги вазият ҳақида менга мунтазам ахборот бериб турибди. Полиция терактнинг келиб чиқиш сабаблари ва барча тафсилотларини ўрганмоқда”, деб ёзди Польша Бош вазири Дональд Туск X ижтимоий тармоғидаги саҳифасида.

Президент Кароль Навроцкий ҳам Краковдаги воқеаларни кузатиб бораётганини маълум қилди. Унинг сўзларига кўра, Миллий хавфсизлик бюроси раҳбари аллақачон Краковга жўнаб кетган.

Эслатиб ўтамиз, аввалроқ АҚШнинг Флорида штати Тампа шаҳри чеккасидаги Citibank компаниясига тегишли офис мажмуасида юз берган отишмада икки киши ҳалок бўлганди. Яна тўрт киши жароҳатланиб, шифохонага ётқизилган эди.