Польшада давлат тўнтаришига уриниш бўлгани эълон қилинди (видео)

Польшада давлат тўнтаришига уриниш бўлгани эълон қилинди. Оломон Варшавадаги Конституциявий суд биносига бостириб киришга уринди. Бу ҳақда Конституциявий трибунал вице-раиси Бартоломей Соханьский маълум қилди.

Қайд этилишича, кеча, 30 октябрь куни трибунал веб-сайтида Соханьский ва трибунал раҳбари Богдан Свенчковскийнинг ваколатлари вақтинча тўхтатилгани ҳақида хабар пайдо бўлган.

“Менга трибунал ва мустақил судьянинг мустақиллигига бундай аралашишга имкон берадиган ҳеч қандай ҳуқуқий асослар маълум эмас. Давлат тўнтариши юз бермоқда”, дейди Соханьский.

Маълум бўлишича, ваколатларни бир ойга тўхтатиб туриш тўғрисидаги қарорни трибунал судьяси Анна Корвин-Пиотровска чиқарган. Ушбу қарорга уларнинг Сейм томонидан сайланган тўрт нафар судьяга Конституциявий трибуналнинг умумий йиғилишида иштирок этишни рад этгани ва бу қарорлар қабул қилинишига тўсқинлик қилгани асос қилиб олинган. Шу билан бирга, Корвин-Пиотровска энг узоқ иш стажига эга бўлган судья сифатида Конституциявий трибунални ташкил этиш ва унинг иш тартиби тўғрисидаги 2016 йилги қонунга таянган ҳолда трибунал раҳбари вазифасини ўз зиммасига олган.

Трибунал қароридан сўнг суд биноси олдида намойишлар бошланган, трибунал ҳудудига эса полиция кирган. Бино олдига трибунал раҳбари Богдан Свенчковский ҳам етиб борган, аммо полиция уни суд ҳудудига ўтказмаган. Шундан сўнг, у йиғилган намойишчилардан лом сўраган. Намойишчилардан бири ўзини чилангар деб таништирган ва панжарани бузиб очган. Аммо кейин Свенчковскийни полиция ўтказмаган. У “барча қонуний судьялар” бугун, 31 октябрь куни у ерга боришини ва бинога киришни талаб қилишини қўшимча қилган.

Польша Президенти Кароль Навроцкий (партиявий бўлмаган, мухолиф “Қонун ва адолат” партияси томонидан қўллаб-қувватланади) Сенегалга қилган ташрифини шошилинч равишда тўхтатган ва мамлакатга қайтмоқда. Ўз навбатида, Польша Бош вазири Дональд Туск (бошқа партиялар билан бирга ҳукмрон коалицияни шакллантирган “Фуқаролик коалицияси” етакчиси) “қонун устуворлиги қайта тикланаётганини” маълум қилган. 

“Қонун ва адолат” (PiS) партияси бошқаруви давридаги бир неча йиллик қонунсизликдан сўнг бу жараён осон кечмаяпти, баъзида оғриқли бўлмоқда ва қатъий ҳаракатларни талаб қилмоқда. Бошқа йўл йўқ”, дейди у.

Польшанинг собиқ президенти Анджей Дуда (“Қонун ва адолат” партияси вакили) X ижтимоий тармоғидаги ўз саҳифасида Польша Жиноят кодексининг 128-моддаси – “Давлат тўнтариши” матнини тўлиқ эълон қилган.