Нидерландия Нью-Йорк ва Оттавадан 86 тонна олтин олиб чиқди

Нидерландия Марказий банки (DNB) Нью-Йорк ва Оттавадан Лондонга 86 тонна олтинни олиб чиқди. Ушбу қадамдан сўнг АҚШ Нидерландия олтин захираларининг энг йирик сақловчиси мақомини йўқотди. Бу ҳақда DNB пресс-релизида сўз боради.

Қайд этилишича, 2026 йилнинг мартидан августига қадар Нидерландия Марказий банки АҚШ ва Канададан Британияга 86 тонна олтинни олиб чиққан. Гап Нью-Йорк ва Оттавада сақланаётган захираларнинг (313 тонна) чорак қисмидан кўпроғи ҳақида бормоқда. Регулятор “ортиб бораётган геосиёсий кескинликни ҳисобга олган ҳолда” шундай қадамга жазм этган. DNB олтинни Лондонга ўтказиш “жиддий инқирозлар”га яхшироқ тайёргарлик кўриш имконини беришини қайд этган.

Маълумот учун, Нидерландиянинг олтин захиралари 612,4 тоннани ташкил этади. 2025 йил охирига келиб уларнинг қиймати 72,2 миллиард еврога баҳоланган. Захираларнинг бир қисми Лондонга олиб чиқилишига қадар АҚШ Нидерландия олтинининг энг йирик сақловчиси эди: Нью-Йорк улушига 31,3 фоиз тўғри келарди. Эндиликда АҚШда Нидерландия захираларининг 18,5 фоиз қисми қолди. Канаданинг улуши камроқ даражада қисқарди: 19,7 фоиздан 18,5 фоизгача. Шу тариқа, мамлакат олтинининг асосий сақловчиси мақоми Буюк Британияга ўтди – унинг улуши 18,1 фоиздан 32,1 фоизгача ортди. Қолган захиралар (30,8 фоиз) Нидерландиянинг Утрехт яқинидаги Зейст шаҳрида жойлашган. DNB олтин захираларининг георафик тақсимланиши эндиликда янада мувозанатли ҳолатга келган, деб ҳисоблайди.

Францияда олтин савдосига кўмаклашувчи Парижнинг National Gold Counter компанияси президенти Лоран Шварцнинг айтишича, АҚШдаги ҳозирги сиёсий вазият бошқа марказий банкларни ҳам ўз олтин захираларини сақлаш учун АҚШ ўрнига бошқа юрисдикцияларни танлашга ундаши мумкин. У Лондон бозорининг ликвидлиги юқорироқ бўлгани сабабли инқироз даврида ундан фойдаланиш ҳақиқатан ҳам осонроқ эканини тушунтирган.

“Марказий банклар айнан ўша ерда ўз олтинларини бошқа банк муассасаларига осонроқ қарзга беришлари мумкин”, дейди у.

Cite Gestion хусусий банки таҳлилчиси Жон Плассарнинг фикрича, Нидерландия томонидан олтиннинг олиб чиқилиши “бир марталик акция”, аммо агар уларнинг ортидан бошқалар ҳам эргашса, бу АҚШга бўлган ишончга путур етказиши мумкин.