New Port қурилиши назоратсиз қолдирилмаган – Қурилиш вазирлиги

Аввалроқ, ижтимоий тармоқларда “New Port” турар жой мажмуаси ҳудудида яшовчи фуқароларга компенсация пуллари тўлиқ берилмаётгани ҳамда уй ноқонуний бузилгани ҳақида видеомурожаат тарқалганди. Кейинроқ, Тошкент шаҳрининг Яккасарой туманида фуқароларни мажбурий кўчириш бўйича ижро ҳаракатлари якунланмасдан туриб уй ўзбошимчалик билан бузиб ташлангани аниқланганди. Макзур ҳолат юзасидан Қурилиш вазирлиги муносабат билдирди.

Қайд этилишича, Вазирлар Маҳкамаси ҳузуридаги Қурилиш ва уй-жой коммунал хўжалиги соҳасида назорат қилиш инспекцияси томоидан бир муддат аввал эълон қилинган маълумотлар объектдаги қоидабузарликлар назоратсиз қолдирилмаганини кўрсатади.

Яккасарой туманида “MEGA LOGISTICHS SERVICHE” МЧЖ томонидан қурилаётган Newport мажмуаси жами 9 та блокдан иборат. Уларнинг 3 таси бўйича Архитектура ва шаҳарсозлик кенгаши ишчи органининг ижобий хулосаси ҳамда тегишли экспертиза хулосалари мавжуд. Ушбу блокларда қурилиш-монтаж ишларини бошлаш Тошкент шаҳар ҳудудий назорат инспекциясида белгиланган тартибда рўйхатдан ўтказилган.

Қолган 6 та блокда эса қурилиш-монтаж ишлари Инспекциядан белгиланган тартибда рўйхатдан ўтказилмасдан олиб борилаётгани назорат тадбирлари давомида аниқланган.

Аниқланган қоидабузарликлар юзасидан буюртмачи – “ MEGA LOGISTICHS SERVICHE” МЧЖга бир неча марта бажарилиши мажбурий бўлган ёзма кўрсатмалар берилган. Компаниядан қурилишни тасдиқланган шаҳарсозлик ҳужжатлари асосида давом эттириш ва объектларни Инспекциядан тегишли тартибда рўйхатдан ўтказиш талаб қилинган.

Бироқ кўрсатмаларда белгиланган талаблар бажарилмаган. Натижада компаниянинг масъул мансабдор шахслари маъмурий жавобгарликка тортилган. Шунингдек, буюртмачининг техник назоратчисига нисбатан тақдимнома киритилиб, тегишли таъсир чоралари қўлланган. Бу билан чоралар чекланиб қолмаган. Инспекция тўплаган ҳужжатлар қоидабузарликларга ҳуқуқий баҳо бериш ва қонунчиликда белгиланган чораларни кўриш учун ҳуқуқни муҳофаза қилувчи органларга юборилган.

Билдирилишича, айнан мана шу босқичда жамоатчиликка мазкур хабарлар эълон қилинган ва унинг ортидан турли мулоҳазалар пайдо бўлган. Шу нуқтаи назардан, Newport мажмуасидаги қурилишлар назорат органлари томонидан умуман эътиборсиз қолдирилган, деган хулоса ҳолатнинг барча жиҳатларини тўлиқ акс эттирмайди. Объектдаги қоидабузарликлар аниқланган, буюртмачига мажбурий кўрсатмалар берилган, масъул шахслар жавобгарликка тортилган ва материаллар ҳуқуқни муҳофаза қилувчи органларга тақдим этилган.

“Шу ўринда вазирлик  қурилиш соҳасида рухсат бериш ва келишув жараёнларини янада соддалаштириш, инсон омилини қисқартириш, жараёнларни рақамлаштириш ва назорат механизмларини такомиллаштиришга қаратилган ислоҳотларни изчил давом эттирмоқда.

Бундан ташқари Вазирлар маҳкамаси ҳузуридаги Қурилиш ва уй-жой коммунал хўжалиги соҳасида назорат қилиш инспекцияси жамоатчиликни қурилиш соҳасида аниқланган қоидабузарликлар бўйича кўрилаётган чоралар ҳақида белгиланган тартибда хабардор қилиб боради”, дейилади хабарда.