Непалда вайроналар остидан яна 2 киши тирик ҳолда топилди

Непалда жорий йилнинг 26 август куни юз берган вайронкор тошқинлардан 10 кун ўтиб, қутқарувчилар 2 кишини тирик ҳолда топди. Бу ҳақда “Associated Press” хабар берди.

Қайд этилишича, улардан бири гидроэлектр станцияси туннелидан, иккинчиси эса вайрон бўлган уйдан олиб чиқилган.

Нашрга кўра, қутқарилган хитойлик эркак Тришули гидроэлектр лойиҳасидаги 225 метр узунликдаги туннелдан олиб чиқилган. Непал ҳарбийлари ва Жанубий кореялик табиий офатлар бўйича мутахассислардан иборат гуруҳ уни туннель ичидан топиб, вертолётда эвакуация қилган. Шу билан Тришули лойиҳасидан тирик қутқарилган ишчилар сони учтага етган.

Яна бир аёл тошқиндан зарар кўрган Нуакот шаҳридаги вайрон бўлган уй ичидан тирик ҳолда топилган. Қутқарувчилар уни лой билан қопланган ҳолатда аниқлаган ва хавфсиз жойга олиб чиққан. Аёл даволаниш учун Катмандуга етказилган.

Айни пайтда қутқарув ишлари Непал бўйлаб жойлашган 12 та гидроэлектр лойиҳасида давом этмоқда. Расмийларга кўра, ушбу объектларда қарийб 900 нафар ишчи бедарак йўқолган, 500 га яқин киши эса турли туннелларда қолиб кетган бўлиши мумкин. Ҳиндистон, Хитой, Жанубий Корея ва АҚШдан келган махсус гуруҳлар вайроналар ва туннеллардан омон қолганларни изламоқда.

Непал табиий офатларни бошқариш агентлиги маълумотларига кўра, 26 августдаги тошқинларда камида 1 300 киши ҳалок бўлган, 5 мингдан ортиқ одам эса бедарак йўқолган.

Эслатиб ўтамиз, аввалроқ Непалда гидроэлектр станцияси туннелида қолиб кетган икки ишчи тўққиз кундан сўнг тирик ҳолда қутқарилган эди.