Нью-Йоркда 30 йилдан бери илк бор қизамиқдан бола вафот этди

АҚШнинг Нью-Йорк штатида қизамиқ билан касалланган бола вафот этди. Бу штатда сўнгги 30 йил ичида ушбу касалликдан қайд этилган илк ўлим ҳолати бўлди. Бу ҳақда “Associated Press” хабар берди.

Маълум қилинишича, бола Нью-Йорк штатининг шимолий қисмидаги Льюис округида вафот этган. Бу ҳудуд Сиракуз шаҳридан 150 километр шимолда жойлашган. Бу ҳақда штат губернатори Кэти Хокул кеча, 2 ноябрь куни маълум қилган.

Нашрга кўра, АҚШда 2000 йилда эмлаш даражасини юқори сақлаш орқали қизамиқнинг мамлакат ичида тарқалишига барҳам берилган эди. Бироқ сўнгги йилларда эмланганлар улуши камайиб, касаллик тарқалишининг олдини олиш учун зарур бўлган 95 фоизлик кўрсаткичдан пастга тушган.

Кэти Хокул боланинг ўлимини олдини олиш мумкин бўлган касалликлардан ҳимояланиш борасида эришилган ютуқлар хавф остида эканининг аччиқ эслатмаси деб атаган. Унинг таъкидлашича, бунга Вашингтоннинг ушбу йўналишдаги сиёсати ҳам таъсир кўрсатмоқда.

АҚШ Касалликларни назорат қилиш ва профилактика маркази жорий йилда мамлакатда қизамиқ билан боғлиқ учта ўлим ҳолатини тасдиқлаган. Бироқ штат соғлиқни сақлаш идоралари бундан кўпроқ ҳолат ҳақида хабар берган. Хусусан, Пенсильванияда йил бошидан буён қизамиқдан беш киши вафот этган, яна бир ўлим ҳолати текширилмоқда.

Маълумот учун, Кэти Хокул октябрь ойи бошида қўшни штатлар ва Нью-Йоркнинг қишлоқ ҳудудларида қизамиқ билан касалланиш ҳолатлари қайд этилгани сабабли фавқулодда ҳолат эълон қилган. Қарор билан қизамиққа қарши эмлаш ҳуқуқига эга тиббиёт ходимлари доираси кенгайтирилиб, фельдшерлар ва дояларга ҳам бундай ваколат берилган. Шунингдек, ҳамшираларга шифокорлар билан бир қаторда таҳлиллар тайинлашга рухсат этилган.

Эслатиб ўтамиз, аввалроқ Францияда асосан чорва ҳайвонларида учрайдиган Шамонда вирусини юқтирган илк инсон вафот этганди.