Microsoft Windows 12’ни чиқаришдан воз кечиши мумкин

Microsoft компанияси 2027 йилда Windows 12 операцион тизимини тақдим этмаслиги, унинг ўрнига Windows 11’нинг 27H2 версиясини чиқариши мумкин. Инсайдерлар маълумотига кўра, ушбу янгиланиш тизимнинг кенг қамровли қайта ишланишини назарда тутади. Бу ҳақда “PCWorld” хабар берди.

Қайд этилишича, Microsoft яқинда Windows 11’нинг 26H2 версиясини тақдим этган. Бироқ янгиланиш фойдаланувчилар кутганидек катта ўзгаришларни олиб келмаган ва унга нисбатан янги функциялар сони ҳам кам бўлган.

Нашрнинг ёзишича, компания ҳозирда Windows 11’нинг навбатдаги йирик янгиланиши устида ишламоқда. 2027 йилда чиқарилиши кутилаётган 27H2 версияси операцион тизимнинг муҳим қисмларини қайта кўриб чиқиш ва такомиллаштиришни ўз ичига олиши мумкин.

Инсайдерлар янги версияни кенг қамровли қайта лойиҳалаш деб таърифламоқда. Унда асосий эътибор тизим сифати, барқарорлиги ва муҳим компонентларини яхшилашга қаратилиши айтилмоқда. Янгиланиш кўлами 2024 йилда чиқарилган Windows 11 24H2 версиясига тенг бўлиши тахмин қилинмоқда.

Шу билан бирга, Microsoft ҳозирча Windows 11 27H2 ёки 2027 йилга мўлжалланган бошқа операцион тизим янгиланишлари ҳақида расмий маълумот бермаган. Шу сабабли бу хабарлар ҳозирча норасмий маълумот сифатида қаралмоқда.

Мутахассислар фикрича, Microsoft ҳозирча Windows 12 номидан фойдаланмаслик орқали янги операцион тизимга нисбатан юқори кутилмалар ва босимнинг олдини олишга уринаётган бўлиши мумкин. Компания эса Windows 11’ни босқичма-босқич такомиллаштириш ва фойдаланувчилар фикрини инобатга олишга кўпроқ эътибор қаратмоқда.

Эслатиб ўтамиз, аввалроқ Microsoft компанияси харажатларни камайтириш ва сунъий интеллектга йўналтирилаётган катта инвестицияларни молиялаштириш мақсадида 60 мингга яқин ходимига ихтиёрий равишда ишдан кетиш таклифини бераётгани ҳақида хабар берилган эди.