Microsoft 60 минг ходимига ишдан кетиши учун пул таклиф қиляпти

Microsoft компанияси харажатларни камайтириш ва сунъий интеллектга йўналтирилаётган катта инвестицияларни молиялаштириш мақсадида 60 мингга яқин ходимига ихтиёрий равишда ишдан кетиш таклифини бермоқда. Бу ҳақда “Reuters” хабар берди.

Қайд этилишича, таклиф компаниянинг глобал ходимларининг чорак қисмидан кўпроғини қамраб олади. Дастур Windows, Copilot, сунъий интеллект, молия, кадрлар бошқаруви, Xbox ҳамда Windows + Devices йўналишларида ишлайдиган ходимларга тегишли бўлиши мумкин. Маркетинг, тижорат фаолияти ва хавфсизлик бўлимлари эса дастурга киритилмайди.

Microsoft компаниясининг кадрлар бўйича директори Эми Коулманнинг ходимларга йўллаган мурожаатида айтилишича, дастур компаниядан кетишни ўйлаётган ходимларга бу жараённи қўллаб-қувватлаш асосида амалга ошириш имконини беради. Шу билан бирга, компаниянинг айрим бўлинмаларига ўз ходимлари сонини ўзгараётган эҳтиёжларга мослаштиришга ёрдам беради.

Компания жорий йил давомида капитал харажатлари учун 175 миллиард доллар сарфлашни режалаштирган. Ушбу маблағнинг катта қисми сунъий интеллект учун маълумотлар марказлари ва чипларни ривожлантиришга йўналтирилади. Бу харажатлар инвесторларда киритилган сармоялар кутилган даромадни бериши борасида саволларни юзага келтирмоқда.

Microsoft’нинг йиллик ҳисоботига кўра, жорий йилнинг 30 июнь ҳолатига компанияда дунё бўйлаб 223 минг нафар доимий ходим ишлаган. Шунингдек, компания жорий йилнинг бошида АҚШдаги ишчи кучининг қарийб 7 фоизига, яъни 9 минг нафарга яқин ходимига ихтиёрий ишдан кетиш таклифини берган.

Бундан ташқари, июль ойида Microsoft глобал ходимларининг қарийб 2,1 фоизига тенг бўлган 4,8 мингта иш ўрнини қисқартиришини эълон қилган эди. Ўшанда компания Xbox ўйинлар бизнесини қайта ташкил этиш ва айрим студиялар фаолиятидан воз кечиш орқали харажатлар самарадорлигини оширишни кўзлаган.

Янги дастур вақт билан чекланган ва ихтиёрий хусусиятга эга. Microsoft маълумотига кўра, у Канада, Ҳиндистон, Буюк Британия ва АҚШдаги иштирокчи жамоаларнинг 70-даража ва ундан паст лавозимдаги ходимлари учун амал қилади.

Эслатиб ўтамиз, аввалроқ Netflix компанияси ходимларининг қарийб 6 фоизини ишдан бўшатишга қарор қилгани ҳақида хабар берилган эди.