Меган Маркл отаси билан алоқасини узгани маълум бўлди

Сассекс герцогиняси Меган Маркл 2025 йилда отаси Томас Марклга мактуб ёзиб, унга фарзандлари билан учрашишга рухсат бермаслигини ва у билан бошқа алоқага чиқмаслигини билдирган. Бу ҳақда BBC хабар берди.

Қайд этилишича, мактубда отасига нисбатан ёш қизларга жинсий зўравонлик қилиш ҳақидаги даъволардан хабардор экани ҳам билдирилган. Мактуб Томас Маркл Филиппинда оёғи ампутация қилинганидан кейин шифохонада даволанаётган пайтда юборилган.

Аввалроқ, Томас Марклнинг Филиппиндаги собиқ уйидан болаларга нисбатан жинсий зўравонликка оид материаллар топилгани ҳақида хабарлар тарқалган. Унинг ўғли, Меган Марклнинг ўгай укаси кичик Томас Маркл, отасининг буюмлари орасидан шундай тасвирлар ва видеоларни топганини айтган. У бу ҳақда АҚШ Федерал қидирув бюросига (ФҚБ) ҳам мурожаат қилгани маълум қилинган.

ФҚБ мазкур даъволардан хабардор эканини тасдиқлаган. Филиппин расмийлари ҳам ҳолат юзасидан текширув бошлаган. Мамлакат Ички ишлар вазири Жонвик Ремула полиция Томас Марклнинг компьютерини олиб қўйганини ва унда рақамли экспертиза ўтказилишини билдирган

Томас Маркл эса ўзига қўйилаётган айбловларни рад этмоқда. У “Mail on Sunday” нашрига берган интервьюсида Филиппинга аввалги сафарлари давомида жинсий хизматлар учун пул тўлаганини тан олган, бироқ вояга етмаган қизлар билан жинсий алоқада бўлганини ва болаларга нисбатан жинсий зўравонлик тасвирларига эга бўлганини инкор қилган.

Меган Маркл жорий йилнинг 23 октябрь куни эълон қилган баёнотида отаси билан муносабатларини деярли бутунлай узганининг сабабларига ҳам тўхталган. У отасига оид ташвишли айбловлар ҳақида маълум қилган ва эҳтимолий жабрланган болалар ҳақида қайғураётганини билдирган. Шунингдек, нима сабабдан отасига фарзандлари билан мулоқот қилишга рухсат бермаганини тушунишларини исташини айтган.

Буюк Британия пойтахти Лондон полицияси 2019 йилда Томас Марклга оид бир қатор даъволар акс этган мактубни олганини тасдиқлаган. Ўша вақтда мактуб ҳақида Сассекс герцоги ва герцогинясига маълумот берилган. Ҳозирда полиция ушбу ҳолатга қандай муносабат билдирганини қайта кўриб чиқмоқда.

Меган Маркл ва отаси ўртасидаги муносабатлар 2018 йилда, унинг шаҳзода Гарри билан тўйидан олдин ёмонлашган. Томас Маркл соғлиғи билан боғлиқ муаммолар сабаб тўйда қатнашмаган. У ўтган йили бир неча марта инсультни бошдан кечирганидан кейин Филиппинга кўчиб ўтган. Оёғи ампутация қилинганидан сўнг эса АҚШнинг Флорида штатидаги реабилитация марказида даволанаётгани хабар қилинган.

Эслатиб ўтамиз, аввалроқ Буюк Британия қироли Чарльз III шаҳзода Гарри ва унинг рафиқаси Меганнинг мамлакатга қайтганидан кейин ҳам қироллик оиласининг расмий вазифаларни бажармайдиган аъзолари бўлиб қолишини яна бир бор тасдиқлагани ҳақида хабар берилган эди.