Машҳур актёр ўғриликда гумонланмоқда (видео)

Туркиянинг машҳур театр актёри Ўкан Каражан Истанбулнинг Шишли туманидаги тадбир вақтида стол устида турган ноутбукни ўғирлаганликда гумон қилинмоқда. Бу ҳақда “Haberler” хабар берди.

Қайд этилишича, воқеа жорий йилнинг 27 февраль куни Шишли Марказ маҳалласидаги Дарюлажезе кўчасида содир бўлган. Э.Ш.А. исмли шахс жорий йилнинг 2 март куни полицияга мурожаат қилиб, тадбир вақтида ноутбуки ўғирланганини билдирган. У воқеа акс этган хавфсизлик камераси тасвирларини ҳам тақдим этиб, компьютерни Ўкан Каражан олганини иддао қилган.

Полиция ходимлари камера тасвирларини ўрганиб, ноутбукни олган шахс Ўкан Каражан эканини аниқлаган.

Каражан эса полицияга берган кўрсатмасида ноутбукни ўғирлаш ниятида олмаганини, уни адашиб олиб кетганини айтган. Унинг сўзларига кўра, воқеадан бир неча кун ўтиб, жорий йилнинг 1 март куни Э.Ш.А. яна 3 киши билан бирга унинг олдига келган. Каражан уларнинг унга ҳужум қилгани ва дўппослаганини иддао қилган.

Актёрнинг айтишича, улар уни мажбуран олиб кетиб, автомобилнинг юкхонасига жойлаштирган. Шундан сўнг, машинада унинг бошига қурол дастаси билан беш марта уришган. Каражан бу ҳолатни ўзига нисбатан зўравонлик ва мажбурлаш сифатида баҳолаган ҳамда компьютер масаласидаги можаро ортидан айнан шу воқеа содир бўлганини билдирган.

Бироқ Каражаннинг онаси И.К. ўғлининг бу гапларини рад этган. Унинг айтишича, Ўкан воқеа куни ифтор дастуридан сўнг уйга компьютер билан келган ва уни ўзига совға қилишганини айтган. Бир неча кундан кейин эса компьютерни олиш учун келган шахсга онаси уни топширган.

Онаси Ўкан хонасидан умуман чиқмаганини, ҳеч ким уни мажбуран уйдан олиб кетмаганини ва калтакламаганини билдирган. Шунингдек, у ўғлида руҳий муаммо борлигини, дори-дармонларини бир муддатдан бери мунтазам қабул қилмай қўйгани сабабли хатти-ҳаракатлари беқарор бўлиб қолганини айтган.

Ўкан Каражан “ошкора ўғрилик” жинояти бўйича қўлга олиниб, жорий йилнинг 7 март куни судга юборилган. У судга юборилганидан сўнг озод қилинган.

Айни вақтда тарқалган хавфсизлик камераси тасвирларида Каражаннинг телефон орқали гаплашгани, стол устидаги ноутбукни кўздан кечиргани, кейин уни қўлтиғига олиб, воқеа жойидан чиқиб кетгани акс этган.

Эслатиб ўтамиз, аввалроқ гиёҳванд моддалар билан боғлиқ айбловлар бўйича бўлган, TikTok’да “Доктор Фуд” номи билан танилган, 8 миллиондан ортиқ обуначига эга блогер Жорж Диб Ливанда қўлга олинган эди.