Кремль Украина билан музокаралар қачон бўлишини маълум қилди

Россия, АҚШ ва Украина ўртасида Россия-Украина урушини якунлаш бўйича тинчлик музокаралари жорий йилнинг 4 ноябридан кейин Абу-Дабида ўтказилиши кутилмоқда. Бу ҳақда Россия президенти ёрдамчиси Юрий Ушаков журналистларга маълум қилди.

Ушаковнинг айтишича, музокаралар санаси фронтдаги вазият ва халқаро шароитга боғлиқ бўлади.

“Бу ҳам фронтдаги вазиятга ва умуман, шароитга боғлиқ бўлади“, деган у.

Унинг таъкидлашича, Россия делегацияси таркиби ҳали тўлиқ шакллантирилмаган бўлса-да, унинг асосий қисми тайёр.

Шунингдек, Ушаков аввалги музокаралар бекор қилинганини ҳам эслатган. Унинг даъво қилишича, Украина томони аввалги учрашувни барбод қилган.

Кремль матбуот котиби Дмитрий Песков эса музокаралар даврида ўт очишни тўхтатиш бўйича келишув йўқлигини билдирган.

Эслатиб ўтамиз, Ушаков жорий йилнинг 21 октябрь куни Санкт-Петербургда Путин ва АҚШ президентининг махсус вакили Стив Уиткофф ўртасидаги учрашувдан кейин ҳам музокараларни ноябрь ойининг иккинчи ўн кунлигида қайта бошлаш имконияти ҳақида гапирганди. Унинг сўзларига кўра, асосий масалалардан бири Россия ва Украина учун хавфсизлик тизимини шакллантириш бўлади.

Шунингдек, Украина Президенти Владимир Зеленский Украина, АҚШ ва Россия ўртасидаги уч томонлама музокаралар ноябрь ойида ўтказилиши мумкинлигини маълум қилганди.