Космосда янги сайёра топилди

Нидерландияда жойлашган Амстердам университети олимлари TOI-2431 b номли янги сайёрани аниқлади. Бу ҳақда “Universe Today” хабар берди.

Сайёра NASA’нинг TESS телескопи ёрдамида аниқланган. Тадқиқотчиларнинг айтишича, TOI-2431 b’да йил айланиш даври ҳозиргача аниқланган сайёралар орасида энг қисқаларидан бири ҳисобланади. Ер қуёш атрофини 365 кунда тўлиқ айланса, TOI-2431 b  шу даврда 1600 мартадан кўп айланади. Бу Ердаги бир йил 5,4 соатда ўтиб кетишини англатади.

Сайёра ўз юлдузига жуда яқин – атиги 933 минг километр масофада (бу 0,0063 астрономик бирлик) жойлашган. Бу яқинлик унинг юзасини 2000 келвингача (тахминан 1727 даража С) қиздиради. 

Гарчи TOI-2431 b ҳажман Ерга ўхшаш бўлса-да, унинг бошқа хусусиятлари сезиларли фарқ қилади. Жумладан, радиуси Ернинг 1,5 баробарига, массаси эса 6,2 баробарига тенг. Унинг ўртача зичлиги 1 сантиметр куб учун 9,4 граммни ташкил этади, бу эса Ер зичлигидан анча юқори.

Юлдузнинг кучли тортиш кучи туфайли сайёранинг шакли ҳам ўзгарган – олимларнинг ҳисоб-китобларига кўра, унинг бир ўқи иккинчисидан 9 фоизга қисқароқ, яъни TOI-2431 b юмалоқ эмас, бироз яссилашган шаклга эга.

Мутахассислар фикрича, бу сайёра узоқ яшамайди. Ҳисоб-китобларга кўра, яна 31 миллион йил ўтгач, у ўз юлдузига жуда яқинлашади ва бутунлай йўқ бўлиб кетади. 

Эслатиб ўтамиз, аввалроқ xалқаро олимлар гуруҳи HD 20794 d экзосайёрасининг кашф этилгани ва унинг яшашга яроқли бўлиш эҳтимолини тасдиқлаганди. Ушбу суперер синфига мансуб сайёра биздан 20 ёруғлик йили узоқликда жойлашган бўлиб, у ўз юлдузининг яшаш зонасида ҳаракатланади.