Хорватияда ўрмонлар ёняпти: минглаб аҳоли эвакуация қилинди

Хорватиянинг сайёҳлик шаҳри Омишда кучли шамол туфайли ўрмон ёнғини содир бўлиб, мингга яқин киши эвакуация қилинди. Ёнғин оқибатида 36 киши жароҳатланган. Бу ҳақда “Reuters” хабар берди.

Маълумотларга кўра, ёнғин жорий йилнинг 13 августидан 14 августига ўтар кечаси Омиш шаҳри яқинида бошланган. Кучли шамол туфайли аланга аҳоли яшаш ҳудудларига ва ўрмонзорларга тарқалган. Ёнғин 1 000 гектардан ортиқ майдонни қамраб олган.

Жароҳатланган 36 киши тез ёрдам хизмати томонидан Омишдан 25 километр шимолда жойлашган Сплит шаҳридаги шифохоналарга олиб борилган. Улардан 14 нафари шифохонага ётқизилган, 7 кишининг аҳволи оғир экани айтилмоқда.

Фалокат туфайли Омишдан Сплитгача бўлган бир нечта шаҳарда вақтинчалик бошпаналар ташкил этилган. Уларда бир кечада қарийб 1 000 киши жойлаштирилган.

Хорватия ёнғин хизмати бош қўмондони Славко Тучаковичнинг айтишича, аланга йўлида учраган барча нарсани вайрон қилган ва катта моддий зарар етказган.

14 август куни эрталаб ёнғин бироз пасайган ва очиқ аланга қолмаган. Ёнғинни бартараф этиш ишларига 286 нафар ўт ўчирувчи, 90 та махсус техника ва 4 та самолёт жалб қилинган. Шунингдек, асосий соҳил автомагистралининг бир қисми ҳаракат учун ёпилган.

Қайд этилишича, ёнғинлар Хорватиянинг сайёҳлик мавсумига ҳам хавф туғдирмоқда. Мутахассислар Европа бўйлаб иссиқ ҳаво ва қурғоқчилик ўрмон ёнғинлари учун қулай шароит яратаётганини таъкидламоқда.

Эслатиб ўтамиз, аввалроқ Канаданинг Британия Колумбияси провинциясида тез тарқалаётган ўрмон ёнғинлари сабабли фавқулодда ҳолат эълон қилиниши ортидан 20 мингдан ортиқ аҳоли эвакуация қилингани ҳақида хабар берилган эди.