Холанд соч турмаги сабабли авиакомпанияни судга берди

“Манчестер Сити” ва Норвегия терма жамоаси ҳужумчиси Эрлинг Холанд Norwegian Air Shuttle авиакомпаниясини судга берди. Бу ҳақда “Goal” хабар қилди.

Қайд этилишича, даъво Холанд ва Британиянинг York Promotions Ltd компанияси номидан Осло туман судига киритилган. Иш бўйича дастлабки видеоконференция жорий йилнинг 9 октябрь куни ўтказилиши режалаштирилган.

Низо авиакомпаниянинг ижтимоий тармоқларда Жаҳон чемпионати вақтида эълон қилган рекламасидан келиб чиққан. Унда Norwegian самолётининг тасвирига Холанднинг ўзига хос сариқ соч турмаги – думча рақамли тарзда қўшилган ва “Биз ҳеч қачон бундай норвегияликни кўринмаганмиз”, деган ёзув жойлаштирилган.

Мазкур постлар кейинчалик ўчириб ташланган. Авиакомпания эса рекламани шунчаки ҳазил ва спортчига мухлислик сифатида изоҳлаган.

Norwegian компанияси матбуот вакили Эйвинд Хаммер Мюре суддан чақирув келганини тасдиқлаган. Унинг айтишича, компания даъвони тушунмаган ва келгусида ҳам норвегиялик спортчиларни қўллаб-қувватлаш имкониятига эга бўлишни истайди.

Берген университетининг маркетинг ҳуқуқи бўйича профессори Торе Лунде эса Холанднинг даъвоси ҳуқуқий жиҳатдан асосли бўлиши мумкинлигини билдирган. Мутахассислар Норвегия қонунчилиги спортчиларнинг ташқи кўриниши ва шахсий имжидан компаниялар томонидан рухсатсиз тижорий фойдаланишига чекловлар қўйишини таъкидламоқда.