Кенияда 18 қаватли бино қулаб тушди (видео)

Кениянинг пойтахти Найробида қурилаётган 16–18 қаватли бино қулаб тушди. Ҳодиса оқибатида етти киши вайроналар остида қолиб кетган бўлиши мумкин. Бу ҳақда BBC хабар берди.

Ҳодиса кеча, 23 октябрь куни тушдан кейин Найробининг Истли ҳудудида содир бўлган. Тахминан 16 ёки 18 қаватли бино қулашидан аввал унинг пастки қавати ўпирилиб тушган. Шундан сўнг бутун иншоот қулаб, атрофни чанг қоплаган.

Қайд этилишича, бино қулаган вақтда унинг юқори қаватларида ўнлаб қурувчилар ишлаётган бўлган. Уларнинг аксарияти бинодан чиқишга улгурган. Кения Ички ишлар вазири Кипчумба Муркоменнинг айтишича, ҳодиса вақтида иншоотда бўлган 67 нафар қурилиш ишчисидан 66 нафари ҳеч қандай жароҳат олмасдан қутулган. Яна бир ишчи ҳаёт учун хавфли бўлмаган жароҳатлар олган.

Бедарак йўқолган етти киши эса бинoнинг қуйи қаватларида жойлашган дўконларда бўлган деб тахмин қилинмоқда. Расмийлар бино ҳали қурилиш жараёнида бўлишига қарамай, унинг пастки қаватларидаги 11 та дўкон аллақачон фаолият бошлаганини билдирган.

Ҳодиса жойидан олинган тасвирларда бинoнинг бетон қаватлари бир-бирининг устига қулаб тушгани кўринади. Қутқарувчилар вайроналар остида қолган одамларни топиш учун металл конструкцияларни кесиб, қидирув ишларини олиб бормоқда.

Ҳозирча бинoнинг нима сабабдан қулагани аниқ эмас. Шунингдек, унинг қурилиши тасдиқланган лойиҳа ва хавфсизлик талабларига мувофиқ олиб борилганми, деган саволлар ҳам юзага келган.

Кения Миллий қурилиш бошқармаси баёнотида иншоотни қураётган компания, меъмор ва конструкция муҳандиси аниқланганини маълум қилган. Бироқ бино қулашидан олдин қурилиш майдони текширилган ёки текширилмагани ҳақида маълумот берилмаган.

Найроби губернатори Сакажа Жонсоннинг маҳаллий ОАВга айтишича, бино эгалари ундан фойдаланиш учун зарур ҳужжатларга эга бўлмаган. У марказий ҳукуматни тасдиқланган қурилиш лойиҳалари ва хавфсизлик талабларига риоя қилмайдиган қурувчиларни жазолаш борасида маҳаллий ҳокимият ваколатларини кенгайтиришга чақирган.

Эслатиб ўтамиз, аввалроқ Туркиянинг Истанбул шаҳри Жевизли маҳалласи Доғу кўчасидаги 7 қаватли бино қисман қулаб тушган эди.