Канадада ёш бола сабабли парвоз бекор қилинди

Канадада йўловчи самолёти бортидаги бола хавфсизлик камарини тақишдан бош тортгани сабабли рейс бекор қилинди. Оқибатда йўловчилар кейинги кунги рейсга қайта рўйхатдан ўтказилган. Бу ҳақда “BBC” хабар берди.

Қайд этилишича, воқеа 6 август куни Porter Airlines авиакомпаниясининг Виктория шаҳридан Торонто томон парвоз қилиши керак бўлган самолётида юз берган. Парвозга тайёргарлик вақтида ёш бола ўз ўриндиғида тик турган ва хавфсизлик камарини тақишдан бош тортган.

Авиакомпания маълумотларига кўра, боланинг ота-онаси ҳамда экипаж аъзолари уни хавфсизлик камарини тақишга кўндиришга уринган, бироқ бу уринишлар самара бермаган.

Шундан сўнг экипаж самолётни терминалга қайтаришга қарор қилган. Авиакомпания “бундай хавфсиз бўлмаган шароитда самолёт ҳавога кўтарила олмаслиги”ни билдирган ва бола ҳамда унга ҳамроҳлик қилаётган ота-онани самолётдан туширган.

Рейснинг кечикиши сабабли самолёт ярим тунда учиш-қўниш йўлаги ёпилгунга қадар парвозни амалга ошира олмаган. Шу боис барча йўловчилар кейинги кунги рейсга қайта жойлаштирилган.

Болалар авиацияси хавфсизлиги бўйича эксперт Лиа Тусо экипажнинг қарорини тўғри деб баҳолаган. Унинг сўзларига кўра, хавфсизлик камарини тақмаган бола кучли турбулентлик, айниқса, самолёт ҳавога кўтарилаётган ёки қўнаётган вақтда, хавфли тарзда отилиб кетиши ва бошқа йўловчиларга урилиши мумкин.

Бироқ воқеа ижтимоий тармоқларда турли мунозараларга сабаб бўлган. Айримлар ота-оналар фарзандларининг хатти-ҳаракатларини қатъийроқ назорат қилиши кераклигини таъкидлаган бўлса, бошқалар айрим болалар самолётдан қўрқиши ёки хавфсизлик камарини тақишга қийналиши мумкинлигини билдирган.

Рейс йўловчиларидан бири Арие Козучнинг айтишича, бола безовталик қилмаган, аксинча, қўрқиб кетгандек кўринган. Унинг сўзларига кўра, бола ўриндиқ остига яширинган ва уни камар билан боғлашга уринишганда, яна ўриндиқ остига сирғалиб кирган.

Эслатиб ўтамиз, аввалроқ Россиянинг Москва шаҳридаги Шереметьево халқаро аэропортида рейсга кечиккан 2 аёл самолётга етиб олиш учун учиш-қўниш йўлагига чиқиб, самолётни тўхтатишга урингани ҳақида хабар берилган эди.